Kryeministri i Kosovës, Albin Kurti, ka reaguar pas vrasjes së Arlinda Zekajt, duke vënë në pikëpyetje trajtimin institucional të rasteve të dhunës ndaj grave.
Gjatë mbledhjes së 64-të të Këshillit të Përgjithshëm të Lëvizjes Vetëvendosje, Kurti deklaroi se rasti i Arlindës tregon se ndjekja e procedurave të përcaktuara me ligj dhe kërkimi i ndihmës nga institucionet nuk janë shoqëruar me garantimin e sigurisë së saj.
Të lidhura
None found
“Vrasja e Arlinda Zekajt na ka përballur edhe një herë me një të vërtetë të rëndë se një grua mund t’i ndjekë të gjitha rrugët që i parasheh ligji, të denoncojë dhunën, të kërkojë mbrojtje, madje të paralajmërojë me shkrim se i rrezikohet jeta dhe prapë të përfundojë e vrarë”, deklaroi Kurti.
Sipas kryeministrit, Arlinda kishte ndjekur pikërisht hapat që institucionet u rekomandojnë grave kur përballen me dhunë.
“Arlinda bëri atë që institucionet u kërkojnë grave ta bëjnë kur përballen me dhunë”, u shpreh ai.
Kurti rikujtoi se një ditë më parë ishin bërë publike të dhënat mbi rrjedhën e rastit dhe mangësitë e konstatuara në zinxhirin institucional, përfshirë edhe mungesën e bashkëpunimit mes institucioneve përkatëse.
Ai bëri të ditur se do të kërkohet përgjegjësi për çdo zyrtar që nuk ka përmbushur detyrat e veta, duke mos përjashtuar as përgjegjësinë penale.
“Ritheksoj që do të angazhohemi deri në fund që secili zyrtar përgjegjës që nuk e ka kryer detyrën të japë përgjegjësi, jo vetëm disiplinore, por edhe penale. Secili përgjegjës i secilës hallkë duhet të hetohet”, tha Kurti.
Ai nënvizoi gjithashtu se neglizhenca në kryerjen e detyrës duhet të pasohet me masa konkrete.
“Kushdo që ka neglizhuar punën duhet të japë përgjegjësi dhe do të përballet me masa disiplinore dhe penale”, përfundoi kryeministri.
