Plani për stadiumin e ri “Generali”, që do të shërbejë si shtëpi e përbashkët për Milanin dhe Interin, po qartëson edhe të ardhmen e impiantit legjendar “Giuseppe Meazza”.
Siç raporton Calciomercato, shembja e stadiumit ekzistues nuk pritet të fillojë përpara vitit 2031, kur pranë tij do të ndërtohet impianti i ri. Demolimi mund të zgjasë afërsisht dy vjet, me përfundimin e parashikuar në vitin 2032 ose 2033.
Të lidhura
None found
Projekti nuk parashikon zhdukjen e plotë të “San Siros”. Do të ruhen një pjesë e tribunës “Curva Sud”, që përkon me sektorin blu, dhe një segment i tribunës portokalli. Të dyja pjesët do të krijojnë një strukturë të veçantë në formë “L”-je.
Pjesët e tjera të impiantit do të përdoren për zyra dhe veprimtari tregtare. Në plan janë përfshirë edhe hapësira të gjelbra dhe dyqane, në një sipërfaqe prej rreth 5.000 metrash katrorë, si dhe objekte që do t’u shërbejnë të dy klubeve.
Milani dhe Interi po diskutojnë gjithashtu se çfarë do të bëhet me ulëset. Sipas propozimit në shqyrtim, tifozëve mund t’u dhurohen ose t’u shiten 60.654 prej 75.817 ulëseve gjithsej.
Shpenzimet për rrënimin e “San Siros” vlerësohen në 127 milionë euro. Fillimisht do të hiqen pajisjet teknike, kabllot dhe turniket, ndërsa më pas do të çmontohen trarët e kuq karakteristikë dhe strukturat prej betoni të armuar.
Edhe pse pjesa më e madhe e stadiumit pritet të shembet, segmentet që do të mbeten do të shërbejnë si shenjë përkujtimore e një prej impianteve më ikonike të futbollit italian.
