Mbledhja e Konferencës së Kryetarëve, u shoqërua me kundërshtime dhe akuza ndaj mazhorancës. Deputetja e Partisë Demokratike, Jorida Tabaku, kundërshtoi përjashtimin për 60 ditë të Gazment Bardhit dhe Klevis Balliut, ndërsa përfaqësuesi i Partisë së Lirisë, Tedi Blushi, kërkoi reagimin e Kuvendit për cenimin e pretenduar të të drejtave të opozitës dhe për kërcënimet ndaj deputetëve.
Në qendër të reagimit të Tabakut ishte vendimi i Komisionit të Etikës ndaj kryetarit të Grupit Parlamentar të PD-së, Gazment Bardhi, dhe deputetit Klevis Balliu. Ajo e quajti të papranueshme këtë masë, duke argumentuar se Rregullorja e Kuvendit e lejon përjashtimin 60-ditor vetëm në raste të përcaktuara.
Të lidhura
None found
Sipas deputetes demokrate, vendimi i miratuar një ditë më parë nga Komisioni i Etikës bie plotësisht në kundërshtim me Rregulloren. Tabaku tha se ai dëshmon mungesë vlerësimi dhe ndjeshmërie për respektimin e saj.
Kundërshtimet e saj përfshinë edhe propozimet për të rishikuar programin e punës dhe kalendarin parlamentar. Ajo vuri në dukje se axhenda e Kuvendit është tashmë e ngarkuar me projektligje, interpelanca dhe shqyrtimin e buxhetit.
Në vend të ndërhyrjeve në kalendar, Tabaku kërkoi që përparësi t’u jepet interpelancave dhe projektligjeve, trajtimi i të cilave është shtyrë nga seancat e mëparshme.
Ndërhyrja e Tedi Blushit solli debate me kryetarin e Kuvendit, Niko Peleshi, dhe kryetarin e grupit parlamentar të Partisë Socialiste, Taulant Balla. Përfaqësuesi i Partisë së Lirisë drejtoi akuza të forta ndaj shumicës parlamentare.
Sipas Blushit, mazhoranca po shkel të drejtat kushtetuese të opozitës dhe po e shfrytëzon Kuvendin për të kaluar vendime që cenojnë interesat e qytetarëve. Ai e përshkroi institucionin si noter dhe rrobaqepës të atyre që i quajti akte kriminale dhe ligje të porositura nga Edi Rama.
Përjashtimin e deputetëve opozitarë, Blushi e konsideroi një mohim të të drejtave të tyre dhe një hap që thellon shkeljet e Kushtetutës.
Ai kundërshtoi edhe miratimin e hartës territoriale, duke e përshkruar atë si hartë të shpopullimit. Në këtë kuadër, u bëri thirrje qytetarëve të reagojnë ndaj vendimmarrjes së mazhorancës.
Gjatë diskutimit, Blushi ngriti gjithashtu pretendime për kërcënime e shantazhe ndaj deputetëve në lidhje me votimet parlamentare. Duke përmendur Erion Braçen dhe Elisa Spiropalin, ai pretendoi se të dy kanë pohuar se janë kërcënuar ose shantazhuar.
Për këto pretendime, Blushi kërkoi një qëndrim nga Kuvendi dhe hetimin e çështjes. Sipas tij, kërcënimi ndaj deputetëve përbën një akt kriminal shumë të rëndë, i cili duhet hetuar.
Kritika pati edhe për sigurinë gjatë seancave plenare. Blushi iu referua blindave, gardheve metalike dhe pranisë së shtuar të policisë në afërsi të Kuvendit, duke i cilësuar këto masa si shenja të një situate diktatoriale.
Një tjetër kërkesë e përfaqësuesit të Partisë së Lirisë ishte që Kuvendi të shprehet për konfliktin ndërmjet Gjykatës së Posaçme dhe Dhomës Kombëtare të Avokatisë. Ai argumentoi se kjo situatë mund të sjellë pasoja për procesin e rregullt ligjor.
