Karabinierët italianë të Njësisë së Specializuar Shumëkombëshe (MSU), në kuadër të misionit të Forcës së Kosovës (KFOR) të udhëhequr nga NATO-ja, patrullojnë rregullisht në Mitrovicë. Sipas KFOR-it, këto patrullime ndihmojnë në ruajtjen e një mjedisi të sigurt dhe të qetë.
Të lidhura
None found
KFOR-i bëri të ditur se patrullimet i sigurojnë misionit një prani të dukshme e të pandërprerë në të gjithë rajonin. Ato u japin gjithashtu njësive mundësinë të krijojnë një pasqyrë të situatës dhe të ndjekin gjendjen e sigurisë në terren.
Në njoftim thuhet se këto veprime janë pjesë e angazhimit të vazhdueshëm të KFOR-it për sigurinë dhe stabilitetin, si dhe për mbështetjen e lirisë së lëvizjes së të gjithë njerëzve që jetojnë në Kosovë, në mënyrë transparente dhe të paanshme.
KFOR-i theksoi se vijon të përmbushë mandatin e mbështetur në Rezolutën 1244 të Këshillit të Sigurimit të OKB-së të vitit 1999. Ky mandat synon të kontribuojë në një mjedis të sigurt dhe të qetë për të gjithë njerëzit në Kosovë dhe të garantojë lirinë e lëvizjes në çdo kohë. Sipas njoftimit, KFOR-i vepron në mënyrë të paanshme dhe në bashkërendim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), sipas roleve të tyre përkatëse në reagimin ndaj çështjeve të sigurisë.
