Zgjedhjet parlamentare në Rusi, të cilat po zhvillohen që prej së premtes, janë shoqëruar me mbi një mijë sulme kibernetike ndaj infrastrukturës së lidhur me procesin e votimit, sipas Komisionit Zgjedhor të vendit.
Të lidhura
None found
Kryetarja e këtij institucioni, Ella Pamfilova, deklaroi se objektiv i sulmeve kanë qenë sistemet ruse të përfshira në organizimin e zgjedhjeve. Të dhënat u publikuan nga agjencitë ruse të lajmeve.
Bëhet fjalë për sulme DDoS, një teknikë që synon të dërgojë një sasi të jashtëzakonshme kërkesash në të njëjtën kohë drejt sistemeve kompjuterike, duke i mbingarkuar dhe penguar funksionimin e tyre të zakonshëm.
Pamfilova tha se goditjet u realizuan nga grupe “shumë profesionale dhe të koordinuara mirë”, të cilat, sipas saj, përdorën edhe mjete të inteligjencës artificiale. Ajo shtoi se shumica e sulmeve vinte “nga jashtë vendit”.
Krahas infrastrukturës zgjedhore, sipas saj, u vunë në shënjestër edhe rrjetet e telekomunikacionit në Rusi. Kryetarja e Komisionit Zgjedhor pretendoi se këto sulme “mbajnë shenja të ndërhyrjes së Ukrainës”.
Megjithatë, pretendimi lidhur me origjinën e sulmeve nuk është konfirmuar në mënyrë të pavarur.
Autoritetet ruse njoftuan edhe të shtunën, gjatë ditës së dytë të votimit, se sistemi elektronik i zgjedhjeve ishte goditur nga një “sulm kibernetik shumë i fortë”. Sipas tyre, ndërhyrja vijoi përgjatë gjithë ditës.
Votimi përmes internetit po zhvillohet në rreth 30 zona të Rusisë.
