Franca dhe shtete të tjera europiane janë përballur gjatë javëve të fundit me një shtim të sulmeve hibride ruse, deklaroi presidenti francez Emmanuel Macron.
Të lidhura
None found
Pas një takimi me drejtuesit e partive politike të përfaqësuara në Asamblenë Kombëtare, Macron tha në një konferencë për shtyp se kërcënimi i ardhur nga Rusia është rritur. Sipas transmetuesit francez BFM, ai u shpreh se gjatë javëve të fundit është intensifikuar veçanërisht kërcënimi hibrid rus ndaj europianëve dhe Francës.
“Natyra e agresionit rus po ndryshon”, theksoi presidenti francez.
Mes rasteve që ai i cilësoi si shembuj të këtij kërcënimi, Macron përmendi sulmin ndaj një treni që lidh Poloninë me Ukrainën, ndërhyrjet e dronëve në hapësirën ajrore të vendeve europiane dhe përpjekjen për të kryer një sulm me dron ndaj aeroportit të Leipzigut, në Gjermani.
Autoritetet gjermane e kanë fajësuar Rusinë për tentativën e sulmit me dron në aeroportin e Leipzigut, e cila ndodhi në muajin gusht.
Një incident tjetër u raportua fundjavën e kaluar në Ukrainë, ku ish-kryeministri britanik Boris Johnson u përfshi në një situatë sigurie pasi treni me të cilin po udhëtonte u godit nga një dron rus.
Paralajmërimet e Macron vijnë në një periudhë kur vendet europiane kanë shtuar vëmendjen ndaj aktiviteteve që i konsiderojnë pjesë të luftës hibride ruse, mes tyre përdorimi i dronëve, sabotazhi dhe ndërhyrjet në infrastrukturën kritike.
