Arrigo Sacchi ironizon derbin: Pres një ndeshje të shëmtuar

Arrigo Saki, në cilësinë e Mjeshtrit të Madh të futbollit italian, ka analizuar derbin e Milanos. Nga ekipet deri te trajnerët, gjithçka përfundon në “skanerin” e 73-vjeçarit.

DERBI – “Interi është një shpresë, ndërsa Milani një e panjohur. Pres një ndeshje jo të bukur mes dy skuadrave, që nuk janë në gjendje të mirë. Kuqezinjtë kanë mbetur prapa sepse nuk kanë ecur si duhet gjatë sezonit, teksa Kontes i duhet të përfshijë në skuadër lojtarët e rinj. Uroj shumë që të gabohem. Në derbi do të ketë shumë agresivitet, por futbolli nuk është vetëm kaq, sepse përfshin emocionet, estetikën, harmoninë dhe spektaklin”.

KONTE – “Konte është një profesionist i madh dhe një njeri që jep jetën për futbollin. Pretendon të përmirësohet gjithmonë dhe ia del, mbase sepse është inteligjent dhe i përgatitur. Fundja, futbolli nuk është vetëm sisteme dhe skema, por një filozofi. Në derbi pres që skuadra e tij të ketë një ekuilibër më të madh mes atyre që kanë detyra sulmuese dhe të tjerëve që i kanë mbrojtëse”.

PIOLI –”Nuk kam çfarë t’i këshilloj Stefanos, të cilin e njoh mirë dhe më duket një djalë i shkëlqyer. I uroj të arrijë të propozojë një lloj të veçantë futbolli, sepse është në një ambient ku kërkesa është e lartë dhe zgjedhjet shpesh janë të dhimbshme”.


Shtuar 9.02.2020 19:36