Kryeministri Edi Rama ka kujtuar sot të atin e ndjerë, përmes një homazhi postuar në rrjetet sociale, ku kujton ndër të tjera porositë që ai i ka dhënë për jetën.
“Im atë sot do të mbushte 88, nëse një goditje fatale në zemër nuk do t’ia kishte ndërprerë befasisht rrugëtimin në këtë botë plot 22 vjet më parë, kur vdekja e tij më solli në Tiranë e më ndryshoi rrugëtimin tim. Por kjo është një histori tjetër”, shkruan Rama.
Teksa përmend të gjithë akuzat që janë hedhur mbi figurën e të atit, Kristaq Ramës ndër vite, kryeministri thotë:
“Kishte të drejtë im atë, mos e harro asnjëherë, në këtë jetë ke ardhur për të lënë kujtimin tënd, tek fëmijët e tu, tek ata që të njohën vërtetë dhe në qofsh shumë i zoti, tek populli yt. Të tjerat i merr era dhe në fund edhe trupi i vetë njeriut erë bëhet”.
