COVID-19/ Shkoi në spital e nuk tregoi se është kthyer nga Italia, 51-vjeçari pronar holeti në Durrës

Janë shtuar në masë të infektuarit në Shqipëri dhe kjo ndodh më së shumti për shkak se të prekurit, të ardhur nga vendet e prekura nuk tregojnë nga kanë ardhur duke u bërë vatër për COVID-19.

Detaje të tjera bëhen të ditura lidhur me rastin e ri të identifikuar në Durrës një ditë më parë, burime për A2 bëjnë me dije se 51-vjeçari kishte 15 ditë që ishte kthyer nga Italia, pasi udhëtonte shpesh për shkak të biznesve që ushtron.

Ai është pronar i një hoteli në Qerret, ndërsa lidhur me ekzaminimet e kryera të familjarëve apo personave të tjerë të kontaktit me të deri më tani kanë rezultuar negativë, ndërkohë që vijon edhe në të tjerë persona kryerja e ekzaminimeve për gjurmim të mëtejshëm të kontakteve që 51-vjeçari ka pasur pas kthimit të tij nga shteti fqinj.

Fillimisht ai është paraqitur në urgjencën e Spitalit Rajonal Durrës për ndihmë mjekësore, pa treguar historinë e udhëtimit, ndërkohë që bluzat e bardha në Durrës përsërisin apelin për qytetarët që të mos paraqiten menjëherë në spital, por t’i drejtohen rrugëve të kontaktit të udhëzuara nga instancat shëndetësore, veçanërisht kur këta të fundit kanë histori udhëtimi me vende të prekura nga Covid-19.

Deri tani, në Durrës raportohen 6 persona të prekur nga virusi i ri me origjinë nga Kina dhe një i vdekur.


Shtuar 23.03.2020 15:58