A ju kujtohet Qazim Ismaili, i cili prej 5 vitesh punonte si pompist në një karburant, pranë shtëpisë së tij në Vorë, por që u pranua si vullnetar nga qeveria shqiptare, për të ndihmuar në vijën e parë mjekët dhe infermierët italianë, atëherë kur spitalet ishin dëng me pacientë në fund të muajit mars në Itali?
Ai ishte licencuar për infermier në vitin 2017, por nuk mundi ta ushtrojë profesionin. Ismaili është baba i tre fëmijëve. Ai iu bashkua stafit të vullnetarëve prej 30 mjekësh e infermierësh dhe u shoqërua në Rinas, nga vetë kryeministri Rama, me një fjalim prekës për popullin italian.
Megjithëse u duk groteske, sesi dërgohet infermier një njeri që nuk ka punuar si i tillë, Qazimi shkoi në Itali dhe ndihmoi mjekët italianë për të përballuar pandeminë e egër në veri të fqinjëve. Paçka të gjithave, çfarë u tha e qesëndisën, besoj se të gjithë e keni menduar se pas kthimit ai dhe infermierët e tjerë do ishin një ndihmë e madhe dhe për shkak të përvojës së fituar, për mjekët shqiptarë në vijën e parë të frontit në Shqipëri.
Po a e dini se ku është Qazim Ismaili sot? Në një foto ekskluzive të tij duke punuar, jo në vijën e parë, (për qëllimin me të cilën edhe duhej të ishte dërguar në Itali), por në një fshat, në qendrën Shëndetësore Prezë, ambulanca Afmetaq. Ai do të punojë aty si zëvendësinfermier deri në tetor 2020.
Tani që rastet me të infektuar janë shumëfishuar, edhe vdekjet gjithashtu, u hapën sërish spitalet COVID. Më shumë pacientë priten dhe më shumë mjekë, infermierë dhe personel ndihmës kërkohet. Ne e kemi pyetur posaçërisht Ministrinë e Shëndetësisë a janë futur në veprim infermierët e ardhur nga Italia, por si gjithnjë asnjë përgjigje megjithëse flitet për strategji që përfshinë jo vetëm mjete, por edhe personel.
… Sot Shqipëria nuk është në të njëjtën situatë si Italia në fund të muajit mars, por gjendja duket tepër serioze. Qeveria po diskuton të hapë edhe dy spitale të tjera Covid-19, ndërsa nevoja për kapacitetet mjekësore nuk po plotësohet me të njëjtin ritëm…
… Deri para nisjes për Itali, Qazim Ismaili ishte një nga 6000 infermierët e papunë, një shifër që nisur nga rasti i tij, u detyrua ta japë publikisht në media Blerina Duka, Presidente e Urdhrit të Infermierit.
Ministria e Shëndetësisë thotë se do të hapë dy spitale të reja për shkak të situatës serioze në vend nga pandemia, por ajo nuk jep përgjigje se a është gati (përpos aparaturave të fundit) edhe me staf mjekësor për të përballuar këtë krizë?
A ka Ministria e Shëndetësisë sot një plan konkret për kapacitetin mjekësor që duhet shtuar? A po bën ajo trajnime në staf? Ku janë infermierët që shkuan në Itali për të marrë eksperiencë, apo kanë përfunduar si Qazim Ismaili nëpër cepa komunash?
Por për rikuperimin e stafeve mjekësore (kryesisht ata tek Infektivi që punojnë pa orar) nga lodhja dhe stresi?
E pyetur nga të gjitha sa më sipër, Ministria e Shëndetësisë nuk ka asnjë përgjigje.
Ministria e Shëndetësisë nuk ka përgjigje as për ata mijëra infermierë të papunë se pse nuk i vë në punë tani kur duhet?
Ajo nuk ka asnjë përgjigje as për stafin që po shtrydhet tek Infektivi, me personel të shndërruar në një gjendje jonatyrale, dendur me serume rreth e qark e njerëz të sëmurë, duke u përpjekur të mos infektojnë mendjen. Sot stafi mjekësor i vijës së parë kundër Covid-19 nuk ka më as hapësirën fizike për të qenë mendësisht i lirë.
Pse? Sepse situata është e ngarkuar. Sepse nuk ka përgjigje se kush duhet t’i zëvendësojë.
Sepse autoritetet, ose ata që janë caktuar për këtë punë, nuk po angazhohen (me aq sa duket publikisht) as për ata që i çuan me aq bujë të madhe për t’i kualifikuar në Itali në kulmin e pandemisë. Sepse nuk kanë nevojë më as për Qazim Ismailin.
Por nuk shkohet në këtë situatë me lexime raportesh të përkthyera në Google, apo me deklarata sporadike ekspertësh se çfarë thonë sot nuk thonë nesër…“Askush nuk fiton dot e vetme. Sot jemi të gjithë italianë dhe Italia duhet e do ta fitojë luftën edhe për ne”, ishte kjo fjala e Ramës para mjekëve në fund të muajit mars.
As Shqipëria nuk fiton dot e vetme, mesa duket ajo ka nevojë tani edhe për Qazimin… të paktën ai ka parë vetë se çdo të thotë pandemi COVID-i, më shumë se çdokush tjetër. /Gazeta Si
