Trajneri në largim i Barcelonës, Xavi Hernandez, ka shprehur krenarinë për arritjet e tij me klubin dhe dëshirën për të qenë sërish tifoz i skuadrës.
Xavi në një konferencë për shtyp të shtunën ka four për periudhën e tij në krye të ekipit dhe sfidat që ka përballuar.
“Nuk ka qenë një kohë e lehtë për shkak të gjendjes së klubit. Jam i lumtur sepse kam bërë një punë të mirë, kemi fituar dy tituj, duke fituar ndeshje të rëndësishme dhe duke pasur sukses”, ka thënë Xavi.
“Jam munduar të bëj më të mirën. Ne kemi punuar me shumë dashuri për këtë klub. Unë jam një tifoz i Barçës për gjithë jetën.
E kam ndërgjegjen të pastër, jam krenar për veten dhe i qetë”.
Xavi mori drejtimin e Barcelonës duke nënshkruar një marrëveshje trivjeçare pas largimit të holandezit Ronald Koeman në fund të vitit 2021.
Ai arriti të fitojë La Liga-n në sezonin e tij të parë si trajner.
Në janar të këtij viti, Xavi kishte deklaruar se do të largohej në fund të sezonit, por forma e mirë e skuadrës në prill bëri që ai dhe presidenti Joan Laporta të bien dakord për vazhdimin e qëndrimit të tij për sezonin e ardhshëm, me kontratën që do të përfundonte në qershor 2025.
Megjithatë, situata ka ndryshuar shpejt. Sipas mediave spanjolle, presidenti Laporta është zemëruar nga komentet e Xavit, i cili tha se ishte e vështirë për klubin të konkurronte me Real Madridin dhe skuadrat e tjera elitare evropiane për shkak të kufizimeve financiare.
Këto komente kanë çuar në një ndryshim të papritur në marrëdhëniet mes trajnerit dhe drejtuesve të klubit, duke çuar në largimin e parakohshëm të Xavit.
