Pas vështirësive që shoqëruan sezonin e tij të parë në Francë, Illia Zabarnyi po jep sinjale përmirësimi te Paris Saint-Germain. Mbrojtësi ukrainas duket se po gjen gradualisht vendin e tij në skuadrën parisiene.
Optimizmi në klub është shtuar nga paraqitjet e fundit të tij. Ndeshja e mirë kundër Barcelonës dhe një tjetër provë solide përballë Lyonit sugjerojnë se ai po përparon, por për të siguruar besimin e plotë të stafit teknik duhet të tregojë vazhdimësi në këtë nivel.
Të lidhura
None found
PSG shpenzoi 63 milionë euro në verën e vitit 2025 për ta marrë nga Bournemouth. Me këtë investim, francezët synonin të siguronin një zgjidhje afatgjatë në qendër të repartit të prapavijës dhe një futbollist që në të ardhmen mund të pasonte Marquinhos.
Siç shkruan Le Parisien, gjatë sezonit të parë në Paris ukrainasi nuk arriti ta riprodhonte lehtësisht nivelin e shfaqur në Angli. Luhatjet në lojën e tij, së bashku me hapësirat e pakta në takimet me peshë, sollën dyshime nëse mund të kthehej brenda një kohe të shkurtër në partnerin e përhershëm të Marquinhos në mbrojtje.
Në mbyllje të atij sezoni, thuhet se si trajneri Luis Enrique, ashtu edhe drejtori sportiv Luis Campos, e pranuan se fillimi i mbrojtësit kishte qenë i vështirë. Sidoqoftë, afrimi i tij ishte menduar për një periudhë afatmesme dhe afatgjatë, ndërsa marrëveshja që e lidh me PSG-në zgjat deri në vitin 2030.
Shfaqjet e para në fushë nuk i dhanë vazhdimisht stafit teknik bindjen se Zabarnyi mund të mbante një peshë më të madhe në qendrën e mbrojtjes. Për sfidat kryesore, përparësinë vazhdoi ta kishte Marquinhos, teksa ukrainasi përpiqej të përvetësonte kërkesat taktike të Luis Enriques.
Në këtë përpjekje, atij nuk i mungon përkrahja. Për Luis Enriquen, qendra e mbrojtjes përbën një nga rolet më të vështira të skemës së tij dhe, sipas raportimeve, trajneri i ka kushtuar kohë Zabarnyit për t’i sqaruar filozofinë që kërkon të zbatojë.
Mbështetje gjatë seancave stërvitore i ofrojnë edhe Marquinhos dhe Willian Pacho. Të dy e këshillojnë për vendosjen në fushë dhe mbulimin e hapësirave kur skuadra është në fazën mbrojtëse.
Vështirësitë e përshtatjes në Paris nuk kanë qenë vetëm sportive. Le Parisien raporton se futbollisti ka përjetuar momente të rënda edhe jashtë fushës, për shkak të ndikimit të madh që lufta në Ukrainë ka pasur në përditshmërinë e tij.
Sipas gazetës franceze, tani Zabarnyi shfaqet më i qetë dhe ndihet më i përfshirë si në dhomën e zhveshjes së PSG-së, ashtu edhe në mjedisin e klubit në tërësi.
