Mirëqenia mendore e një fëmije është e lidhur fort me llojin e ushqimit që konsumon çdo ditë, sipas një studimi britanik, që hedh dritë mbi rolin jetësor që luan një dietë e shëndetshme që në moshë të re.
Shëndeti mendor i nxënësve në shkollë përmirësohet veçanërisht me një mëngjes dhe drekë të mirë, si dhe me fruta e perime të përditshme, sipas hulumtimit që përfshin 9,000 fëmijë në Mretërinë e Bashkuar, të kryer nga Universiteti i Anglisë Lindore në Norewich.
“Ndërsa lidhjet midis të ushqyerit dhe shëndetit fizik janë kuptuar mirë, deri më tani, nuk dihet shumë nëse ushqimi luan një rol në mirëqenien emocionale të fëmijëve,” thotë Prof. Ailsa Welch, drejtuese e studimit të botuar në shtator.
“Ka një njohje në rritje të rëndësisë së shëndetit mendor dhe mirëqenies në jetën e hershme, jo më pak për shkak se problemet e shëndetit mendor të adoleshentëve shpesh vazhdojnë deri në moshën madhore, duke çuar në rezultate dhe arritje më të dobëta të jetës,” shton ajo.
Studiuesit i pyetën fëmijët për zakonet e tyre të të ngrënit dhe studiuan faktorë të tillë si gëzimi, aftësia për t’u çlodhur dhe rezultatet në teste, dhe të gjitha këto kontribuuan në vlerësimin e tyre për shëndetin mendor. Ekspertët e shëndetit kanë vënë në dukje prej kohësh një rregull të plotë diete që të gjithë (jo vetëm fëmijët) duhet të hanë pesë porcione fruta ose perime në ditë.
Sipas studimit, një fëmijë 6-vjeçar duhet të hajë 230 gramë perime dhe 210 gramë fruta në ditë. Deri në moshën 13 vjeç, vajzat duhet të hanë 320 gram perime dhe 300 gram fruta, djemtë 390 gram perime dhe 360 gramë fruta. Ato mund të jenë ose të papërpunuara ose të gatuara./albeu.com
