Një studim i ri amerikan, tregon, se varianti Delta i virusit Corona mund të depërtojë më lehtë se të tjerët mburojën imunitare të vaksinës. Megjithatë ajo mbron nga sëmundja e rëndë e vdekja.
Sasia e virusit tek të infektuarit me variantin Delta është dukshëm më e lartë dhe infektimi mund të transmentohet me lehtësi, thuhet në një raport të brendshëm të Autoritetit Amerikan të Shëndetësisë, CDC, të publikuar nga gazeta e njohur, “Washington Post”. Duhet „të pranohet se lufta ka ndryshuar”, thuhet në një nga faqet e raportit. Delta është po aq ngjitëse si lija e dhenve, beson ky autoritet. Lija e dhenve dihet, se mund të përhapet edhe në disa metra përmes ajrit. Drejtuesja e CDC, Rochelle Walensky e vlerësoi studimin si mjaft shqetësues. Së fundmi ky autoritet kishte përshtatur rregullat kundër virusit me përhapjen e variantit Delta përfshirë ashpërsimin e tyre. Edhe për të vaksinuarit rekomandohet mbajtja e maskës në ambientet e mbyllura.
Por efektshmëria e vaksinës kundër COVID-19 nuk është vënë në dyshim nga CDC. Vaksina edhe në rastet e infektimit me Delta mbron me gjasë të madhe nga ecuria e rëndë e sëmundjes apo vdekja. Ky variant i virusit shënon në SHBA më shumë se 80% të rasteve. Aktualisht në SHBA fushata e vaksinimit ndodhet në vendnumëro./DW
