Kryeministri i Greqisë, Kyriakos Mitsotakis ka telefonuar këtë pasdite Fredi Belerin, i cili u zgjodh deputeti i Parlamentit Evropian në Greqi, në një kohë kur ndodhet në burg në Shqipëri për blerje votash.
Sipas mediave greke, Mitsotakis e ka përgëzuar Belerin për fitoren. Nesër pritet që Mitsotakis të zhvillojë një takim në orën 10:00 me eurodeputetët e rinj të Demokracisë së Re, në Megaros Maximos.
Fredi Beleri, i dënuar nga GJKKO për blerje votash në zgjedhjet vendore të 14 majit 2023, është zgjedhur nga grekët si anëtar i Parlamentit Europian. Beleri u rendit i katërti mes të votuarve si kandidat në zgjedhjet helene dhe bëhet një prej 21 eurodeputetëve grekë në PE dhe një prej 7 të zgjedhurve nga sigla e Nea Demokracia te Mitsotakis.
Vetë Beleri e ka konsideruar një triumf të demokracisë, ndërsa në Himarë ka nisur festa mes mbështetësve të tij.
Pavarësisht rritjes të së djathtës populiste, grupi i Partisë Popullore Evropiane (EPP) i qendrës së djathtë, doli i pari, siç kanë bërë në çdo zgjedhje parlamentare evropiane që nga viti 1999, me 186 ligjvënës për dhomën me 720 ulëse.
Qytetarët e Bashkimit Evropian shkuan për të votuar në 27 vendet anëtare mes 6 dhe 9 qershorit, dhe këto zgjedhje kanë ngritur debate të shumta mbi të ardhmen politike të Europës.
