Shembja e një ndërtese në zonën Plaka të Athinës u kushtoi jetën gjashtë personave, mes tyre edhe katër shqiptarëve. Nicoletta Gioni, mike e familjeve të viktimave, ka rrëfyer për Newsbomb detaje prekëse për dy çiftet shqiptare që humbën jetën në këtë tragjedi.
Një prej viktimave ishte Florida Hoxha, e cila ishte martuar së fundmi me Ian Alexander Kirkpatrick. Gioni e përshkroi atë si një grua të jashtëzakonshme, plot energji dhe një avokate shumë të zonja.
Të lidhura
None found
“Ajo ishte një person i mrekullueshëm. Një avokate e shkëlqyer. Plot jetë”, tha mikesha e familjes, e cila pranoi se ende nuk arrinte ta besonte atë që kishte ndodhur. Sipas saj, përmasat e tragjedisë kanë tronditur thellë familjarët dhe të gjithë ata që i njihnin viktimat.
Historia e çiftit tjetër, Florin Hoxha dhe Erisa Cani, është veçanërisht prekëse. Ata ishin martuar pak kohë më parë dhe kishin shkuar në Greqi për muajin e mjaltit, në një periudhë që duhej të ishte ndër më të bukurat e jetës së tyre.
Çifti po përgatitej gjithashtu të bëhej prindër për herë të parë. “Florin dhe Eris ishin shumë të emocionuar sepse prisnin fëmijën e tyre të parë”, rrëfeu Gioni, duke zbuluar se Erisa ishte shtatzënë me një vajzë. Ajo e cilësoi humbjen e dy çifteve si një tragjedi të madhe për familjet dhe miqtë e tyre.
Florida Hoxha dhe bashkëshorti i saj, Ian Alexander Kirkpatrick, 37 vjeç, kishin marrë me qira një apartament përmes Airbnb në katin e parë të ndërtesës. Në të njëjtin kat qëndronin edhe Erisa Cani dhe Florin Hoxha.
Pas shembjes, ekipet e kërkim-shpëtimit punuan për orë të tëra. Në orët e para të mëngjesit të së shtunës u gjet trupi i një gruaje, ndërsa disa orë më pas u nxor edhe trupi i një burri. Dy viktimat ishin një çift të moshuarish që banonte në katin e dytë.
Pak para orës 13:00, nën rrënoja u zbuluan edhe dy trupa të tjerë, të turistëve amerikanë që qëndronin në katin e parë. Pas orës 13:30 u gjetën edhe dy viktimat e fundit, duke shënuar përfundimin e operacionit të shërbimeve zjarrfikëse. Bilanci i shembjes ishte gjashtë persona të vdekur.
