Një varkë që po udhëtonte drejt Ishujve Kanarie është përfshirë në një tragjedi, ku 83 persona raportohet se kanë humbur jetën ose rezultojnë të zhdukur.
Të lidhura
None found
Sipas autoriteteve të shpëtimit dhe organizatës joqeveritare Caminando Fronteras, mjeti lundrues kishte 128 emigrantë në bord dhe ishte nisur nga Afrika e Veriut 27 ditë më parë.
Varka u pikas në mbrëmjen e 2 shtatorit, rreth 120 kilometra në juglindje të Gran Canarias. Një patrullë detare mbërriti pranë saj pas orës 23:00 dhe mundi të shpëtonte 44 persona, të gjithë burra me origjinë nga Afrika Subsahariane.
Gjatë ndërhyrjes në bord u zbuluan edhe pesë trupa, por nxjerrja e tyre nuk u bë e mundur për shkak të kushteve të rënda të detit. Operacioni u komplikua nga erërat e forta dhe dallgët që arrinin deri në 2.5 metra.
Tre prej të mbijetuarve, të cilët ishin në gjendje të rëndë shëndetësore, u dërguan me helikopter në Spitalin Universitar Doctor Negrín në Gran Canaria. Të mbijetuarit e tjerë u transportuan në portin e Arguineguín, ku morën kujdes mjekësor nga ekipet shëndetësore dhe vullnetarët e Kryqit të Kuq.
Caminando Fronteras bëri të ditur se në këtë udhëtim ndodheshin gjithashtu katër gra dhe një foshnjë e porsalindur.
Ndërkohë, autoritetet spanjolle po vijojnë punën për identifikimin e viktimave dhe dokumentimin e plotë të rrethanave të tragjedisë, e cila ndodh në një kohë kur presioni i emigracionit drejt Ishujve Kanarie është në rritje.
