Organizata Botërore e Shëndetësisë u ka kërkuar njerëzve që të anulojnë disa nga planet e tyre të pushimeve për të mbrojtur shëndetin publik pasi varianti Omicron përhapet globalisht.
“Një ngjarje e anuluar është më e mirë se një jetë e anuluar”, tha kreu i OBSH-së, Dr Tedros Adhanom Ghebreyesus, duke shtuar se duhet të merren “vendime të vështira”.
Komentet e tij erdhën pasi ekspertët e shëndetit deklaruan se Omicron tani është varianti dominues në SHBA.
Dr Tedros shtoi se tani kishte prova se varianti “po përhapet dukshëm më shpejt sesa Delta”.
Një numër vendesh, përfshirë Francën dhe Gjermaninë, kanë shtrënguar kufizimet e Covid dhe kanë vendosur kufizime të udhëtimit në përpjekje për të ndaluar përhapjen e variantit të ri. Holanda ka vendosur një bllokim të rreptë për Krishtlindje.
Shtëpia e Bardhë tha të hënën se presidenti Joe Biden nuk po planifikonte të mbyllte vendin. Eksperti më i lartë i sëmundjes infektive në vend, Dr Anthony Fauci, paralajmëroi më herët se udhëtimet për Krishtlindje do të rrisinin përhapjen e Omicron edhe në mesin e të vaksinuarve plotësisht./albeu.com
