Zbërthimi i mesazheve të koduara të aplikacionit SKY, zbuloi si funksiononte një nga grupet më të rrezikshme kriminale në Shqipëri, duke çuar në arrestimin e disa personazheve të rëndësishme nga bota e krimit, policia e deri te prangosja e një prokurori.
Në kuadër të operacionit “Metamorfoza” u prangos zyrtari i lartë i Policisë Oltian Bistri, biznesmeni Pëllumb Gjoka, ish-efektivi Ardit Hasanbegaj, Asmer Bilali, Edmond Preka e të tjerë.
I pyetur në emisionin “Top Story” të moderatores Grida Duma, se cila ishte biseda më e rëndë që ky grup kishte realizuar në aplikacionin “Sky”, gazetari Elton Qyno, tha se bëhej fjalë për një bisedë kur autorët e vrasjes së Gjin Boriçit, kishin diskutuar se si do i shkonin në varrim.
Qyno tha se autorët e kishin shok Boriçin dhe e kishin përdorur në një më herët.
“Biseda më e rëndë është kur u vra Gjin Boriçi, që protagonistët e kësaj vrasjeje i shkojnë edhe në varrim. Dhe që të nesërmen interesoheshin te policia për t’ia kaluar fajin palës tjetër. Ishte një bisedë e poshtër dhe cinike, sepse në fund të fundit ata kishin vrarë shokun e vetë, Gjin Boriçin të cilin e kishin përdorur në një vrasje tjetër, ai kishte punuar për ta”, tha Qyno.
Gazetari tha se edhe bisedat e prokurorit të Kukësit, Xhevahir Lita janë të rënda për nga natyra si një njeri i drejtësisë bëhet vegël e krimit.
“Janë edhe bisedat e tjera të prokurorit, atë prokuror e njoh prej vitesh. Por kur kam lexuar bisedat të bënte me Bajrin dhe Gjokën, duket sikur kishte varur pedalonin e shenjtë të prokurorit te shtëpia e Bajrit. E njoh por sinqershit kam ngelur mjaft i zhgënjyer”, u shpreh ai.
