Kryetari i bashkisë së Mariupolit thotë se disa mijëra banorë nga qyteti i rrethuar janë dërguar në Rusi.
Në një mesazh në Telegram, Vadym Boychenko tha se disa u ridrejtuan në qytete të largëta në Rusi, ndërsa fati i të tjerëve mbetet i panjohur.
BBC shkruan se vetë nuk ka qenë në gjendje të verifikojë pretendimin.
“Ajo që po bëjnë pushtuesit sot është e njohur për brezin e vjetër, i cili pa ngjarjet e tmerrshme të Luftës së Dytë Botërore, kur nazistët kapën me forcë njerëzit”, tha Boychenko.
“Është e vështirë të imagjinohet se në shekullin 21 njerëzit do të deportohen me forcë në një vend tjetër”, shtoi ai.
Rreth 300,000 njerëz janë bllokuar brenda qytetit, pasi ushqimet dhe furnizimet mjekësore po mbarojnë dhe Rusia bllokon hyrjen e ndihmave humanitare.
Sulmet ruse kanë goditur një spital, një kishë dhe blloqe të panumërta apartamentesh, me zyrtarët lokalë që vlerësojnë se rreth 80% e ndërtesave të banimit janë ose të dëmtuara ose të shkatërruara, një e treta e tyre nuk mund të riparohen.
Mariupol ka parë disa nga betejat më të ashpra që kur Rusia pushtoi Ukrainën, tre javë më parë.
Vendndodhja e qytetit port, në detin Azov, është strategjike për Rusinë, pasi do ta ndihmonte atë të krijonte një korridor tokësor midis rajoneve lindore të Donetsk dhe Luhansk, të kontrolluara nga separatistët e mbështetur nga Rusia, dhe Krimesë, gadishullit të aneksuar në vitin 2014./albeu.com
