Vendet perëndimore kanë shkaktuar një krizë globale ushqimore duke vendosur sanksionet më të rënda në historinë moderne ndaj Rusisë, ka thënë zëdhënësi i Kremlinit.
“Rusia ka qenë gjithmonë një eksportues mjaft i besueshëm i grurit. Ne nuk jemi burimi i problemit. Burimi i problemit që çon në urinë botërore janë ata që vendosën sanksione kundër nesh dhe vetë sanksionet”, tha zëdhënësi i Kremlinit Dmitry Peskov.
Rusia dhe Ukraina së bashku përbëjnë gati një të tretën e furnizimeve globale të grurit.
Ukraina është gjithashtu një eksportues i madh i misrit, elbit, vajit të lulediellit dhe vajit të rapit, ndërsa Rusia dhe Bjellorusia, e cila ka mbështetur Moskën në luftë dhe është gjithashtu nën sanksione, përbëjnë mbi 40% të eksporteve globale të lëndës ushqyese potas.
Kombet e Bashkuara kanë thënë se 36 vende mbështeten tek Rusia dhe Ukraina për më shumë se gjysmën e importeve të grurit, duke përfshirë disa nga më të varfrat, mes tyre Libanin, Sirinë, Jemenin, Somalinë dhe Republikën Demokratike të Kongos.
Javën e kaluar, Sekretari i Përgjithshëm i OKB-së Antonio Guterres tha se ai ishte në kontakt intensiv me Rusinë, Ukrainën, Turqinë, Shtetet e Bashkuara dhe Bashkimin Evropian në një përpjekje për të rivendosur eksportet e drithërave nga Ukraina, ndërsa kriza globale e ushqimit përkeqësohet.
Presidenti rus Vladimir Putin, tha Kremlini, gjithashtu u pajtua me vlerësimin e Kombeve të Bashkuara se bota u përball me një krizë ushqimore që mund të shkaktonte zi buke./albeu.com
