Egnatia triumfoi 1-2 ndaj Tiranës në takimin e javës së 10-të të “Abissnet Superiore”. Pas përfundimit të ndeshjes, trajneri i skuadrës fituese, Nevil Dede, komentoi për mediat.
“Kreu i renditjes është diçka që na kënaq. Sa u përket dëmtimeve, uroj që gjendja e Bitrit të mos jetë serioze. Më vjen keq për Grudën, i cili kishte një mundësi për të përfituar. Probleme të tilla ndodhin në futboll, por ne po luajmë çdo tri ditë, ndryshe nga herët e tjera. Megjithatë, po ruajmë të njëjtin nivel dhe të njëjtën strukturë loje.
Të lidhura
None found
Në pjesën e dytë, lojtarët e kuptuan ku qëndronte diferenca. Pamë pikat e dobëta të Tiranës dhe gjetëm mënyrën për ta zgjidhur ndeshjen. Edhe pse bëmë shumë rotacion, sërish nuk arritëm t’i ruanim lojtarët. Në një moment kjo bëhet e pashmangshme dhe shqetësimet janë të pritshme. Fitoren ua dedikoj Sotës, Grudës dhe Bitrit.
Montenegro po jep shumë, por ende nuk është përshtatur. Në momente të caktuara kjo na ka ndikuar. Nuk kemi pasur mjaftueshëm tolerancë për t’i dhënë më shumë minuta dhe për këtë kam edhe unë një pjesë të fajit. Shpresoj që ai të zhbllokohet.
Ekipi tregon sërish se ka cilësitë e një kampioni, por ndeshjet e radhës do të jenë të vështira. Është e natyrshme që lojtarët ta kenë mendjen edhe te Europa. Ngarkesa është e madhe, ndaj po përpiqemi ta shpërndajmë, duke pasur parasysh dëshirën dhe përgjegjësitë që marrin në fushë. Të gjithë duan të japin më të mirën kundër nesh. Gjithsesi, ky është një kampionat i gjatë dhe një luftë sportive. Tani duhet të rikuperojmë për ndeshjen me Craiovën”, u shpreh Dede.
