SPAK dyshon dhe po mbledh prova se disa nga funksionarët e drejtësisë, ku në kohë të ndryshme kanë marrë para dhe janë ndikuar nga katër personat e dyshuar për ‘Toyota Yaris’ dhe çështje të tjera.
Burimet për Top Channel, thanë se po mblidhen prova dhe të dhëna dhe hetues të BKH, kanë vijuar me kryerjen e kontrolleve dhe sekuestrimin e dosjeve jo vetëm në gjykata, por edhe në prokurori.
Teksa nën arrest me burg është vetëm kryeprokurori i pezulluar Aurel Zarka, kurse tre të tjerë janë në kërkim, mësohet se banesat e tyre dhe zyrat janë kontrolluar nga policia.
Nuk ka të dhëna se çfarë është sekuestruar, por në biseda përmenden sipas burimeve edhe shumat e paguara dhe të ofruara funksionarëve të drejtësisë, për të lehtësuar pozitën e të akuzuarve.
Në listën e personave qe kanë dijeni, janë edhe shtetasit që dyshohen se kanë përfituar në mënyrë të padrejtë nga drejtësia.
Një ditë më parë, Gjykata Antikorrupsion, urdhëroi median të mos nxjerrë akte nga ai fashikull duke paralajmëruar se në rast se ky vendim shkelet, do ketë hetime për nxjerrje të sekretit hetimor.
Njëri nga të dyshuarit rezulton të ketë fotografuar akte të dosjes ‘Toyota Yaris’ që ishte në atë kohë nën hetim nga ish-prokurorë të krimeve të rënda, duke ua treguar palëve.
Ndërsa e njëjta gjë përmendet në komunikime edhe për hetimin pasuror ndaj Suel Çelës, një i shumëkërkuar nga SPAK. Për të thuhet se nuk do të ngrihej akuzë për pasurinë e tregut agroushqimor, por vetëm për një automjet.
