Eurodeputetja dhe raportuesja për Kosovën në Parlamentin Evropian, Viola von Cramon tha se nuk mund të gjendet asnjë krahasim mes Kosovës dhe Republikës Srpska.
E pyetur për të komentuar deklaratat e zyrtarëve në rajon që e krahasojnë Kosovën me Republikën Srpska, von Cramon i tha Al Jazeeras se këto janë çështje të veçanta dhe se BE-ja merret veçmas me Bosnjë e Hercegovinën dhe dialogun ndërmjet Kosovës dhe Serbisë.
“Nuk dua të spekuloj se entiteti boshnjak i Republika Srpskas duhet të jetë monedhë për koncesionin e Serbisë ndaj Kosovës. Ne kemi nevojë që këto vende t’i drejtohen demokratizimit të tyre, zgjidhjes paqësore të çështjeve të brendshme dhe zbatimit të plotë të reformave që kanë të bëjnë me Bashkimin Evropian, e jo drejt krijimit të vazhdueshëm të tensioneve dhe nacionalizmit”, tha von Cramon.
Ballkani Perëndimor sipas saj nuk është vend më i mirë sot dhe as më afër Bashkimit Evropian, pavarësisht përpjekjeve të Brukselit “për ta sjellë atë rajon në klubin evropian sa më shpejt të jetë e mundur”.
“Kriza aktuale na kujton në Bashkimin Evropian se sa i rëndësishëm është rajoni i Ballkanit Perëndimor për sigurinë dhe stabilitetin e përgjithshëm evropian. Ka shumë çështje në rajon, por dy janë dialogu strukturor ndërmjet Beogradit dhe Prishtinës dhe Bosnjë-Hercegovina. Të dyja çështjet kanë tërhequr shumë vëmendje, me krizën e fundit në veri të Kosovës dhe krizën institucionale të vazhdueshme në Bosnjë e Hercegovinë”, tha ajo.
Von Cramon tha se “shumë janë të shqetësuar me të drejtë” pas njoftimit të anëtarit serb të Presidencës së Bosnjë e Hercegovinës, Milorad Dodik, se ai dëshiron të ndahet nga Bosnja dhe hapat konkretë që ai ndërmori për tërheqjen e këtij entiteti nga korniza institucionale e ndërtuar në BeH.
“Është thjesht e papranueshme dhe rrezikon të gjithë përparimin që është bërë në periudhën e pasluftës. Bosnjë e Hercegovina është ende shumë e brishtë, por edhe komplekse, dhe ne po e monitorojmë nga afër situatën atje, duke kërkuar një përgjigje të fortë evropiane, pra sanksione për të gjithë ata që cenojnë sovranitetin e vendit”, deklaroi anëtarja e partisë të të Gjelbërve gjermanë në PE./albeu.com/
