Inter ia ka dalë të triumfojë 2-1 në shtëpi ndaj Salzburg, duke marrë kështu një sukses të rëndësishëm në grupet e Champions League. Ndeshja nisi mirë për austriakët, të cilët kërkuan të befasojnë skuadrën vendase. Zikaltërit kaluan në avantazh në minutën e 19-të, falë Alexis Sanchez, me një goditje të bukur.
Në fundin e pjesës së parë, ekipi i Inzaghit u përpoq që të dyfishonte shifrat, por e kishte mjaft të vështirë. Në fillimin e pjesës së dytë, Salzburg gjeti ekuilibrat me lojtarin izraelit, Oscar Gloukh.
Barazimi zgjati shumë pak, pasi Calhanoglu shndërroi në gol një penallti, duke ndezur sërish festën te tifozët e nënkampionëve të Europës në tribuna.
Në minutat e fundit u aktivizua edhe Kristjan Asllani, lojtari i Shqipërisë. Lautaro gjeti golin e sigurisë, por u anulua për offside, pak minuta para fundit. Me këtë fitore, Interi renditet në vendin e parë në grupin D me 7 pikë, ndërsa Salzburg në vendin e 3-të me 3 pikë.
