Një 21-vjeçare ka shpëtuar pas një rënieje të rëndë nga dritarja e një apartamenti në katin e tetë të një pallati në Athens, Georgia.
Të lidhura
None found
Kristin Sargent, studente e vitit të fundit në degët e financës dhe marketingut në Universitetin e Georgias, ndodhej të shtunën në mbrëmje në kompleksin “The Rambler”, kur ndodhi aksidenti.
Referuar raportit të policisë, e reja po kërcente mbi një divan ose dyshek që ndodhej pranë një dritareje të hapur. Ajo ka kaluar përmes rrjetës mbrojtëse dhe më pas ka rënë nga kati i tetë, duke përfunduar pranë zonës së pishinës.
Oficeri Erik Ellison bëri të ditur se në vend u gjetën prova që sugjerojnë se studentja mund të jetë përplasur me një stol metalik gjatë rënies. Një pjesë e mbështetëses së tij ishte këputur, ndërsa në jastëk u konstatuan gjurmë gjaku.
Dëshmitarët kanë deklaruar se një shezlong mund ta ketë zbutur deri diku rënien e saj përpara goditjes në tokë.
Babai i Kristinës, Richard Sargent, tha se vajza po trajtohet në terapi intensive dhe ka pësuar disa fraktura, por gjendja shëndetësore e saj është në përmirësim.
“Ajo po lufton fort dhe do të jetë mirë”, u shpreh ai, duke shtuar se familja e konsideron veten jashtëzakonisht me fat që ajo mbijetoi.
Menjëherë pasi u njoftuan për aksidentin, familjarët u nisën nga Virginia drejt Georgias.
Sipas policisë, të dhënat e mbledhura deri në këtë fazë tregojnë se ngjarja ka qenë aksidentale, ndërsa hetimet vazhdojnë.
Pas incidentit, administrata e kompleksit u rikujtoi banorëve se dritaret janë të pajisura me mekanizma sigurie dhe u kërkoi atyre të mos i prekin, heqin ose çaktivizojnë. Megjithatë, autoritetet nuk kanë konfirmuar ende nëse mekanizmi i sigurisë së dritares nga e cila ra studentja ishte aktiv në momentin e ngjarjes.
Ndërkohë, miqtë dhe studentët e tjerë i kanë dërguar Kristinës dhjetëra mesazhe, duke i uruar shërim të shpejtë.
