Kreu i grupit të armatosur libanez Hezbollah tha sot se banorët e Izraelit verior nuk do të mund të kthehen në shtëpitë e tyre për fillimin e vitit të ardhshëm shkollor nëse qeveria e tyre vazhdon sulmin në Rripin e Gazës .
Hezbollahu ka shkëmbyer zjarr me ushtrinë izraelite përgjatë kufirit jugor të Libanit prej muajsh. Grupi thotë se lëshon raketa në Izrael për të mbështetur aleatin e tij palestinez Hamasin dhe për të parandaluar Izraelin të nisë një sulm në Liban.
Në fjalimin e tij televiziv sot, Sayed Hassan Nasrallah përsëriti se organizata e tij do të luftojë për aq kohë sa të vazhdojë sulmi izraelit në Gaza.
“Lidhja e frontit mbështetës libanez dhe Gazës është përfundimtare. Askush nuk do të jetë në gjendje të shkëputet”, shtoi ai.
Përleshjet kanë zhvendosur dhjetëra mijëra njerëz në të dy anët e kufirit dhe ekziston frika e një lufte më të gjerë midis dy rivalëve.
Izraeli thotë se dëshiron të sigurojë që veriorët të kthehen në shtëpi, qoftë përmes një marrëveshjeje të negociuar ose një sulmi ushtarak kundër Libanit.
Familjet shpresonin të ktheheshin deri më 1 shtator, kur fillon viti i ri shkollor. Por Nasrallah iu drejtua të zhvendosurve të premten, duke u thënë: “Nëse dëshironi që çështja të zgjidhet, shkoni te qeveria juaj dhe thuajini të ndalojë luftën në Gaza”.
