Më shumë se 20 mijë banorë dhe pushues janë detyruar të largohen nga rajoni i Girondës në jugperëndim të Francës, teksa zjarret e fuqishme po përfshijnë zonën dhe kushtet e motit me temperatura të larta e erëra të forta po e mbajnë situatën jashtë kontrollit.
Të lidhura
None found
Sipas të dhënave të autoriteteve franceze, rreth 12 mijë persona janë zhvendosur tashmë nga zonat e kërcënuara, ndërkohë që po vijon operacioni për largimin e 8,800 të tjerëve. Deri tani, flakët kanë përshkuar afërsisht 3,100 hektarë tokë pranë Gjirit të Arcachon.
Pjesa më e madhe e të evakuuarve janë pushues që ndodheshin në kampingjet e gadishullit Lège-Cap-Ferret, ndërsa masa parandaluese janë marrë edhe në fshatin Claouey. Prefektja Sophie Brocas bëri të ditur se nuk raportohet për të plagosur, por disa akse rrugore dhe sipërfaqe pyjore janë mbyllur për arsye sigurie.
Kreu i zjarrfikësve të Girondës, Marc Vermeulen, theksoi se skuadrat kanë punuar pa ndërprerje gjatë natës, por paralajmëroi se parashikueshmëria e zjarrit është e ulët për shkak të rritjes së temperaturave dhe ndryshimit të drejtimit të erës.
Ngjarjet kanë shënuar edhe humbje njerëzish. Dy punonjës të ekipeve të zjarrfikësve humbën jetën në fillim të javës duke u përballur me një vatër tjetër zjarri pranë aeroportit të Bordeaux, teksa ministri i Brendshëm francez, Laurent Nuñez, u shprehu ngushëllimet familjeve dhe nderoi sakrificën e tyre.
Edhe shtete të tjera të Evropës Jugore po përballen me flakë të mëdha. Në Itali, një zjarrfikës mbeti i vrarë gjatë një operacioni në Siçili, ku janë regjistruar mbi 350 vatra zjarri dhe hetuesit dyshojnë se shumica e tyre janë shkaktuar nga dora e njeriut.
Spanja po përjeton temperatura ekstreme dhe zjarre shkatërruese. Në afërsi të Toledos janë djegur rreth 890 hektarë, kurse në rajonin e Guadalajarës flakët kanë gëlltitur mbi 35 mijë hektarë, duke u konsideruar si zjarri më i madh i vitit në vend.
Sipas një raporti të Shërbimit të Ndryshimeve Klimatike Copernicus, Evropa vijon të jetë kontinenti që po ngrohet me shpejtësinë më të madhe në botë, me mbi 95% të territorit që regjistroi temperatura mbi mesataren gjatë vitit 2025. Valët e gjata të të nxehtit po krijojnë terren të favorshëm për përhapjen e zjarreve në shumë pjesë të kontinentit.
