Ushtria dhe policia në Izrael janë vënë në gatishmëri të lartë për shkak të frikës nga sulmet palestineze si hakmarrje për vdekjen e 10 palestinezëve gjatë një operacioni të forcave izraelite në Bregun Perëndimor të pushtuar .
Policia izraelite tha në një deklaratë se ka ngritur nivelin e gatishmërisë, duke rritur praninë e saj në Jerusalem dhe qytete të tjera, të shqetësuara për aktet e mundshme të hakmarrjes nga palestinezët e armatosur.
Në të njëjtën kohë, Iron Dome (sistemi i mbrojtjes kundër raketave të Izraelit) është gati për të kapur sulme të mundshme me raketa nga Rripi i Gazës, me ushtrinë izraelite që nënvizon se është vendosur në një nivel të lartë gatishmërie.
Dhjetë palestinezë u vranë, duke përfshirë një djalë 16-vjeçar dhe më shumë se 100 të tjerë u plagosën nga ushtarët izraelitë gjatë një bastisjeje në Nablus, në pjesën veriore të Bregut Perëndimor të pushtuar.
Ndërkohë, Departamenti Amerikan i Shtetit shprehu shqetësimin e tij të thellë për përshkallëzimin e dhunës në Lindjen e Mesme. Zëdhënësi i Departamentit të Shtetit tha se qeveria amerikane ishte e shqetësuar se operacioni i ushtrisë izraelite në Bregun Perëndimor mund të prishë përpjekjet për të rivendosur qetësinë në rajon.
Uashingtoni njeh shqetësimet e sigurisë së Izraelit, por është gjithashtu i shqetësuar për viktimat civile dhe numrin e madh të të plagosurve, tha Ned Price./albeu.com
