Edin Dzeko, kapiteni i përfaqësueses së Bosnjës dhe Hercegovinës në futboll, do ta mbyllë rrugëtimin e tij me fanellën kombëtare më 2 tetor 2026, në përballjen ndaj Suedisë.
Të lidhura
None found
Sulmuesi legjendar boshnjak e bëri publik vendimin përmes rrjeteve sociale, duke konfirmuar se dueli i 2 tetorit kundër Suedisë do të jetë paraqitja e tij e fundit për ekipin kombëtar.
Dzeko shkroi se shpesh e kishte pyetur veten se kur do të mbërrinte ky çast, por nuk e kishte menduar se do të përjetonte kaq shumë emocione gjatë formulimit të mesazhit. Ai njoftoi se më 2 tetor, përballë Suedisë, do ta zhvillojë ndeshjen e radhës dhe njëkohësisht të fundit me përfaqësuesen.
Sipas tij, asnjë arritje në karrierë nuk mund të barazohet me krenarinë që ka ndier sa herë ka veshur fanellën kombëtare. Dzeko e përshkroi këtë si ëndrrën e tij të fëmijërisë, të cilën e ka mbajtur me vete në secilën prej 151 paraqitjeve kur pati nderin ta përfaqësonte vendin në fushën e futbollit. Ai theksoi se krenaria për atë fanellë ka mbetur gjithmonë e njëjtë si në herën e parë.
Kapiteni kujtoi se nga ndeshja ndaj Turqisë kanë kaluar pothuajse njëzet vjet. Gjatë kësaj periudhe, sipas tij, kanë ndryshuar shumë gjëra dhe ka ndryshuar edhe ai vetë, por dashuria për fanellën nuk është zbehur asnjëherë. Dzeko tha se tashmë e ndien se ka ardhur momenti për t’u pensionuar, ndërsa arritjen e moshës 40 vjeçare si pjesë e kombëtares e lidhi me faktin se në çdo rast ka dhënë gjithçka që kishte.
Ai e cilësoi përfaqësimin e vendit të tij si privilegjin më emocional që i ka falur futbolli. Kualifikimi në Kupën e parë të Botës në vitin 2014, sipas Dzekos, vazhdon të jetë një nga çastet më të lumtura të jetës së tij si futbollist. Në zemrën e tij do të mbeten përgjithmonë edhe emocionet e përjetuara natën kur realizoi kundër Uellsit, si dhe ato në Zenicë ndaj Italisë në mars.
Dzeko tha se pamjet e njerëzve të tij duke festuar në rrugët e qyteteve përbënin një tjetër dhuratë të jashtëzakonshme që ia kishte sjellë futbolli. Ai shtoi se do të vijë koha për t’i falënderuar të gjithë personat që e kanë shoqëruar dhe mbështetur përgjatë këtij udhëtimi të mrekullueshëm.
Për momentin, sulmuesi boshnjak kërkoi që tifozët të jenë të pranishëm në mbrëmjen e ndeshjes kundër Suedisë, në mënyrë që të ndajnë së bashku edhe një emocion tjetër. Ai nënvizoi se çdo moment i jashtëzakonshëm është përjetuar bashkërisht dhe se në të njëjtën mënyrë dëshiron ta kalojë edhe natën e fundit me kombëtaren: me të gjithë pranë tij dhe duke mbajtur veshur fanellën që e ka dashur që kur ishte fëmijë dhe që do ta dojë gjatë gjithë jetës.
Dzeko ka regjistruar 151 paraqitje dhe 73 gola për kombëtaren e Bosnjës dhe Hercegovinës. Debutimin me përfaqësuesen ai e bëri kundër Turqisë, në stadiumin “Asim Ferhatović Hase”.
