Dhjetë marinarë rezultojnë të zhdukur pasi anija e mallrave “Tugberk İmamoglu” u fundos në Detin Marmara, pas përplasjes me një tjetër mjet lundrues pranë Stambollit.
Të lidhura
None found
Përplasja u regjistrua rreth orës 03:00, rreth 32 kilometra në jug të Silivrit, periferi e Stambollit. Sipas autoriteteve, anija me flamur turk “Alsu”, e cila u përfshi në aksident, nuk shfaqi dëmtime të dukshme.
Pas incidentit, autoritetet humbën kontaktin me ekuipazhin e “Tugberk İmamoglu”. Në zonë janë gjetur një varkë shpëtimi dhe pjesë të tjera të anijes së mallrave, por deri tani nuk është zbuluar asnjë shenjë e personave që ndodheshin në bord.
Drejtoria e Përgjithshme e Çështjeve Detare njoftoi se anija vlerësohet si e fundosur, pasi nuk iu përgjigj komunikimeve. Edhe telefonat e anëtarëve të ekuipazhit rezultuan të fikur ose pa përgjigje.
Ministri turk i Transportit, Abdulkadir Uraloğlu, deklaroi se në anije ndodheshin dhjetë marinarë, mes tyre edhe kapiteni, dhe se të gjithë ishin shtetas turq. Anija, me gjatësi 90 metra, ishte nisur nga porti mesdhetar i Iskenderunit drejt Ereğlit, në Detin e Zi.
Ndërkohë, “Alsu”, e gjatë 91 metra, po lundronte nga Kocaeli në drejtim të Aliağas, në bregdetin e Egjeut.
