Një banesë trekatëshe me ngjyrë të gjelbër në Dhunge Bazaar të Nepalit është kthyer në një prej pamjeve më të komentuara në rrjetet sociale. Shtëpia e familjes Pyakurel është cilësuar nga disa si “shtëpia mrekulli”, ndërsa të tjerë e kanë pagëzuar “shtëpia virale”. Në një video të shpërndarë gjerësisht, familjarët shihen duke vëzhguar nga ballkoni i katit të tretë, të tmerruar teksa një përmbytje e fuqishme përplasej mbi banesën e tyre. Megjithatë, ndërtesa arriti të qëndronte në këmbë.
Të lidhura
None found
Chhatra Bahadur Pyakurel, 67 vjeç, tha se gjithçka nisi pak pasi kishte shoqëruar nipin e tij deri te autobusi i shkollës. Menjëherë pas kësaj, vala e përmbytjes, e shkaktuar nga shembja e një akullnaje në rajonin Himalajan mes Nepalit dhe Tibetit, arriti pranë shtëpisë. Për më shumë se një orë, familja mbeti e pafuqishme përballë situatës, duke parë fillimisht nga ballkoni dhe më pas nga çatia, ndërsa rryma e ujit dhe mbeturinave shtohej pa pushim.
Pyakureli rrëfeu se shqetësimi kryesor ishte fati i nipit të tij. Ai pranoi se për një periudhë familjarët besuan se mbijetesa e tyre varej vetëm nga fati. Edhe një javë pas ngjarjes, pjesa e sipërme e shtëpisë vijonte të ishte pothuajse e padëmtuar dhe vizitorë kureshtarë vazhdonin të ngjiteshin për ta parë. Banesa tashmë është shënuar edhe në Google Maps si një atraksion “rezistent ndaj përmbytjeve”.
Kreu i familjes beson se ndërtesa u shpëtua falë themeleve të vendosura thellë në shkëmb, por nuk përjashton as atë që e quan “faktori hyjnor”. Ndërkohë, disa banorë të zonës mendojnë se një kodër e pozicionuar përballë rrjedhës së ujit mund ta ketë mbrojtur shtëpinë nga goditja më e madhe.
Kati përdhes i banesës ishte ndërtuar në vitin 1995, në kohën kur Pyakureli drejtonte një dyqan ushqimor. Me rritjen e aktivitetit, familja shtoi gradualisht edhe katet e tjera. Por, pavarësisht se ndërtesa mbijetoi, katet e poshtme pësuan dëme të konsiderueshme. Shumë dokumente të rëndësishme, mes tyre certifikata dhe pasaporta, u shkatërruan.
Kur niveli i ujit ra, fqinjët ndihmuan familjen të largohej nga çatia, duke përdorur tuba metalikë si një lloj shkalle të improvizuar. Pyakureli tha se ndihej veçanërisht i lehtësuar që nipi ishte i sigurt, pasi shkolla ndodhej në një zonë më të lartë. Familja u ribashkua të nesërmen pas përmbytjes.
Bishu Mani Rimal, 45 vjeç, banor rreth pesë kilometra më poshtë përgjatë rrjedhës së lumit, deklaroi se nuk e kishte imagjinuar që dikush mund të mbijetonte në kushte të tilla. Ai tregoi gjithashtu se katër shtëpi të tjera të familjes së gjerë të Pyakurelëve u zhdukën, ndërsa përmbytja mori me vete një treg të tërë dhe turbinat energjetike të vendosura përgjatë lumit.
Sipas artikullit, numri i viktimave në Nepal kishte kaluar 1.100 të vdekur, ndërsa rreth 4.000 persona vazhdonin të rezultonin të zhdukur. Në Tibet, qindra njerëz ende mbeteshin të papërcaktuar. Ekipet e shpëtimit, të penguara nga reshjet e pandërprera dhe balta e butë, kishin arritur të nxirrnin të sigurt mbi 11.000 persona, ndërsa mijëra të tjerë qëndronin në strehime të përkohshme. Vetëm në rrethin Nuwakot, mbi 1.200 banesa ishin dëmtuar plotësisht dhe më shumë se 1.000 të tjera pjesërisht; ndërkohë, dhjetëra ura dhe segmente rrugore ishin shkatërruar tërësisht.
