Luciano Spalletti nuk pret që Kenan Yildiz të largohet nga Juventusi, edhe pse Arsenali raportohet se po interesohet për shërbimet e talentit turk.
Të lidhura
None found
Sipas raportimeve të fundit, “Topçinjtë” janë gati të paraqesin një ofertë të konsiderueshme për 21-vjeçarin, ndërsa vlera e mundshme e transferimit mund të arrijë rreth 100 milionë euro.
Megjithatë, këto zëra nuk duket se e shqetësojnë trajnerin italian, i cili ka shprehur qartë dëshirën që Yildiz të vazhdojë të jetë pjesë e Juventusit.
“Jam plotësisht i qetë, sepse të punosh me Yildizin është e lehtë për mua. Mund të ofrojnë çfarëdo shume që duan, unë e dua Yildizin këtu dhe gjithmonë do ta aktivizoj”, deklaroi Spalletti.
Tekniku i Juventusit foli me vlerësim edhe për personalitetin e futbollistit 21-vjeçar, duke nënvizuar pjekurinë e tij dhe faktin se nuk ka arsye të marrë vendime me nxitim për të ardhmen.
Spalletti theksoi se vazhdimësia e Yildizit te Juventusi mbetet me rëndësi për klubin, pavarësisht ofertave apo interesimit që mund të vijë nga skuadra të tjera.
“E ardhmja e tij është tashmë e rëndësishme duke qëndruar te Juventusi, jo sepse ka klube të tjera që duan të shpenzojnë 100 milionë euro për të”, shtoi ai.
Trajneri beson se Juventusi dhe mbështetësit e tij e shohin Yildizin si një lojtar me potencial të jashtëzakonshëm, i cili mund të ngjitet në majat e futbollit.
“Jemi të gjithë të bindur se mund ta shfaqim potencialin e plotë të Kenanit. Ai është një talent që mund të bëhet fenomen në futboll. Edhe tifozët janë të bindur për këtë”, përfundoi Spalletti.
