Korridori sekret në Hormuz, SHBA-ja garanton kalimin e deri në 10 milionë fuçive naftë në ditë

Një korridor i posaçëm detar është ngritur në heshtje nga SHBA-ja në Ngushticën e Hormuzit, duke mundësuar transportin e miliona fuçive naftë nga Gjiri Persik drejt tregjeve ndërkombëtare.

Dy zyrtarë amerikanë i thanë Axios se operacioni ka nisur prej disa javësh dhe synon të ruajë vazhdimësinë e eksporteve të naftës, në një kohë kur bisedimet me Teheranin kanë mbetur të bllokuara.

Rreth 15 deri në 20 anije cisternë kalojnë çdo natë nëpër këtë rrugë të kontrolluar, e cila ndodhet në pjesën jugore të Ngushticës, përgjatë bregdetit të Omanit.

Përmes korridorit po transportohen aktualisht rreth 10 milionë fuçi naftë në ditë. Kjo shifër përbën afërsisht gjysmën e volumit që kalonte nëpër Ngushticë përpara luftës.

Operacioni nuk kufizohet vetëm te shoqërimi i cisternave të mbushura me naftë. Forcat amerikane po bashkërendojnë edhe lëvizjen e anijeve cisternë bosh, të cilat futen në Gjirin Persik nga Deti Arabik, duke kaluar nëpër Ngushticën e Hormuzit.

Pas mbërritjes në portet e vendeve të rajonit, këto anije ngarkohen me naftë dhe rikthehen drejt tregjeve ndërkombëtare përmes të njëjtit korridor detar.

Detajet e plota të këtij operacioni nuk janë bërë publike.

“Ne kemi kontrolluar korridorin jugor të Ngushticës së Hormuzit për dy muaj. Garda Revolucionare mund të shkaktojë probleme, por nuk e kontrollon Ngushticën. Ne e kontrollojmë atë”, deklaroi një prej zyrtarëve amerikanë që është në dijeni të operacionit.

Sipas zyrtarëve amerikanë, gjatë dy javëve të fundit çdo natë kanë kaluar nga 15 deri në 20 cisterna nëpër pjesën jugore të Ngushticës së Hormuzit, duke mbajtur aktive eksportet e naftës.

Volumi mesatar ditor i transportuar po rritet dhe tashmë është pranë nivelit prej 10 milionë fuçish naftë në ditë.

Në disa net, sasia e naftës së larguar nga Gjiri ka arritur në 15 deri në 20 milionë fuçi.

Axios raportoi se për një nga netët e kësaj jave ishte planifikuar kalimi i më shumë se 20 anijeve nëpër korridorin jugor. Nëse plani do të realizohej, rreth 15 milionë fuçi naftë do të mund të dërgoheshin drejt tregjeve ndërkombëtare.

Presidenti amerikan Donald Trump i tha Axios se “një sasi e madhe nafte po del nga Ngushtica e Hormuzit”. Ai theksoi gjithashtu se SHBA-ja nuk po zhvillon aktualisht negociata me Iranin.

“Ata po humbasin kohë. Është humbje kohe të negociosh me ta”, u shpreh Trump.

Presidenti amerikan tha se iranianët “ende kanë njëfarë fuqie luftarake”, por shtoi se, “në përgjithësi janë një hije e vetes së tyre të mëparshme”.