Ambasadori i Mbretërisë së Bashkuar në Kosovë, Jonathan Hargreaves, u prit nga komandanti i misionit të NATO-s në Kosovë, KFOR, gjeneralmajor Özkan Ulutaş, në selinë e këtij misioni, në Kampin “Film City” në Prishtinë.
Të lidhura
None found
Diskutimet u përqendruan te zhvillimet e sigurisë në rajon. Me këtë rast, Ulutaş rikonfirmoi angazhimin e KFOR-it për krijimin dhe ruajtjen e një klime të sigurt e të qetë për të gjithë qytetarët e Kosovës.
Gjeneralmajori Özkan Ulutaş vlerësoi gjithashtu mbështetjen dhe kontributin e vazhdueshëm të Mbretërisë së Bashkuar në misionin e KFOR-it, i cili udhëhiqet nga NATO.
KFOR-i bëri të ditur se mandati i tij vijon të zbatohet në përputhje me Rezolutën 1244 të Këshillit të Sigurimit të Kombeve të Bashkuara. Përmes këtij mandati, misioni kontribuon në garantimin e sigurisë dhe lirisë së lëvizjes për të gjithë qytetarët, duke ruajtur një qasje të paanshme.
Për realizimin e detyrave të tij, KFOR-i mban bashkëpunim të ngushtë me Policinë e Kosovës dhe me misionin e Bashkimit Evropian për Sundimin e Ligjit në Kosovë, EULEX.
