Proceset gjyqësore në Dhomat e Specializuara të Kosovës në Hagë pritet të hyjnë në një fazë vendimtare gjatë muajit shtator.
Të lidhura
None found
Më 16 shtator 2026 është planifikuar shpallja e aktgjykimit për ish-drejtuesit e Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi.
Organizata e Veteranëve të Luftës së UÇK-së ka deklaruar se këtë përfundim e ka pritur prej një kohe të gjatë.
Gazmend Syla, përfaqësues i OVL-së së UÇK-së, tha në një prononcim për Telegrafin se vendimi duhet të mbështetet në prova dhe fakte. Ai shtoi se shpresa e organizatës është që aktgjykimi të jetë lirues.
Sipas Sylës, veteranët dhe organizata e tij e kanë ndjekur me pritje të gjatë këtë proces, pasi tashmë janë bërë 6 vite që bashkëluftëtarët e tyre po qëndrojnë në paraburgim pa një verdikt përfundimtar. Ai theksoi se, ndonëse shpreson për lirimin e tyre, mënyra se si ka vepruar gjykata që nga themelimi i saj e deri më tani ka krijuar dyshime te OVL-ja e UÇK-së.
Syla tha se ekziston frika që gjykata të mos e bazojë vendimin në prova dhe fakte, por të marrë një qëndrim negativ. Shqetësim për organizatën, sipas tij, mbetet edhe mundësia e ndikimit politik në vendimmarrje.
Përfaqësuesi i OVL-së së UÇK-së përmendi gjithashtu vendimin ndaj dy bashkëluftëtarëve të tjerë, të cilët tashmë janë dënuar nga kjo gjykatë. Ai vlerësoi se institucioni ka devijuar nga misioni për të cilin ishte themeluar, duke kujtuar se raporti i Dick Martit, mbi bazën e të cilit ishte krijuar, nuk është më pjesë e aktakuzës.
Syla tha se, nëse aktgjykimi ndaj Thaçit, Veselit, Selimit dhe Krasniqit do të mbështetet në prova e fakte, atëherë ata do të kthehen në shtëpitë e tyre. Në të kundërtën, nëse vendimi do të jetë politik, organizata beson se ai do të jetë negativ.
Hapat e ardhshëm të OVL-së së UÇK-së pritet të përcaktohen në mbledhjen e kryesisë, e cila do të mbahet më 25 gusht.
Syla bëri të ditur se pas kësaj mbledhjeje opinioni publik dhe mediat do të informohen për veprimet që do të ndërmarrë organizata. Deri në zhvillimin e saj, ai tha se OVL-ja e UÇK-së nuk ka marrë ende ndonjë vendim.
