Pamje shqetësuese vijnë nga kalimi hekurudhor në fshatin Llopat të Kumanovës, ku mungesa e sinjalistikës së duhur dhe mosfunksionimi i rampës së sigurisë mund të përbëjnë rrezik serioz për drejtuesit e automjeteve dhe banorët që kalojnë çdo ditë në këtë segment.
Në videon që shoqëron lajmin shihet momenti kur treni kalon në kryqëzimin me rrugën, ndërkohë që rampa e sigurisë nuk është e ulur për të bllokuar kalimin e automjeteve.
Të lidhura
None found
Situata bëhet edhe më shqetësuese për faktin se kjo rrugë përdoret çdo ditë jo vetëm nga banorët e Llopatit, por edhe nga banorët e Komunës së Likovës, ku jetojnë rreth 30 mijë banorë.
Në mungesë të një sistemi funksional paralajmërues dhe të sinjalistikës së qartë, drejtuesit e automjeteve mund të gjenden përballë trenit vetëm pak metra përpara kalimit hekurudhor, duke rritur ndjeshëm rrezikun për aksidente me pasoja të rënda.
Banorët kërkojnë që drejtoria e Hekurudhave dhe Ministria e Transportit, të ndërhyjnë sa më shpejt për funksionalizimin e rampës, vendosjen e sinjalistikës së nevojshme dhe sigurimin e plotë të këtij kalimi hekurudhor, përpara se neglizhenca të përfundojë në tragjedi.
Pamjet e meposhtme tregojnë rrezikun në kalimin hekurudhor në Llopatë.
