Një numër në rritje kanadezësh po heqin dorë nga udhëtimet në Shtetet e Bashkuara. Bojkoti lidhet me politikat e Presidentit Donald Trump kundrejt Kanadasë, tarifat e vendosura nga SHBA-ja dhe deklaratat e tij për aneksimin e shtetit fqinj.
Të lidhura
None found
Të dhënat mbi lëvizjet turistike tregojnë se nuk bëhet fjalë vetëm për raste të veçuara. Ndonëse në prill u shënua një shtim i lehtë i udhëtimeve me automjete drejt SHBA-së, kanadezët realizuan atë muaj rreth 800 mijë udhëtime më pak në territorin amerikan sesa në prill të vitit 2024.
Në vend që të shkojnë në SHBA, shumë kanadezë po preferojnë të vizitojnë zona të vendit të tyre ose destinacione të tjera jashtë tij. Mes tyre është Kent Truscott nga Londra, Ontario, familja e të cilit vendosi në fund të vitit 2024 të mos udhëtonte më në Shtetet e Bashkuara. Ata kishin parashikuar të shkonin në Teksas për të ndjekur një lançim të SpaceX, por e anuluan udhëtimin dhe zgjodhën që paratë t’i shpenzonin brenda Kanadasë.
Në vend të Teksasit, Truscott dhe bashkëshortja e tij vizituan provincat atlantike Nova Scotia dhe Prince Edward Island. Gjatë udhëtimit morën me qira një automjet, përshkuan shtegun Cabot dhe u akomoduan në një resort buzë Atlantikut.
Duke folur për raportet ndërmjet dy shteteve dhe qasjen e administratës Trump, Truscott deklaroi se “ka pasur një ndërprerje thelbësore”. Si arsye ai renditi politikat për emigracionin, retorikën ndaj Kanadasë dhe tarifat amerikane.
Pasojat e këtij bojkoti janë ndier edhe në sektorin turistik amerikan. Të dhënat e përmendura në raport tregojnë se gjatë vitit të kaluar mungesa e vizitorëve kanadezë i ka shkaktuar SHBA-së rreth 3.3 miliardë dollarë kanadezë humbje në të ardhurat nga udhëtimet.
Për të përmbysur këtë prirje, disa qytete dhe shtete në SHBA kanë ndërmarrë fushata që synojnë rikthimin e turistëve nga Kanadaja. Në korrik, bordi i turizmit i qytetit të Nju Jorkut bëri të ditura oferta me ulje 30% për vizitorët kanadezë, ku përfshiheshin dhoma hoteli dhe bileta për shfaqjet në Broadway.
Gjithsesi, vendimet politike nuk janë faktori i vetëm që po ndikon te kjo zgjedhje. Disa kanadezë shpjegojnë se rënia e vlerës së dollarit kanadez i ka bërë vizitat në SHBA më të kushtueshme dhe më pak joshëse.
Për shumë të tjerë, problemi shkon përtej kostove. Sipas tyre, marrëdhënia mes dy vendeve po kalon një krizë dhe turistët kanadezë nuk pritet të rikthehen menjëherë në SHBA, edhe në rast se administrata amerikane ndryshon.
