Gjatë restaurimit të një ndërtese në Saint-Gilles-lez-Termonde, në Flandrën Lindore të Belgjikës, punëtorët zbuluan një sasi të konsiderueshme ari të fshehur brenda një muri.
Të lidhura
None found
Zbulimi u bë të hënën, më 10 gusht, teksa në bodrumin e godinës po vendoseshin tubacione. Punëtorët gjetën në mur një kuti të fshehur, brenda së cilës kishte copëza ari, monedha dhe shufra ari me numra të shënuar.
Media belge HLN raportoi se, bazuar në përllogaritjet paraprake, i gjithë ari mund të ketë një vlerë prej rreth 9 milionë eurosh.
Geert Hillaert, përfaqësues i CAW East Flanders, organizata e mirëqenies sociale që ka në pronësi ndërtesën, deklaroi se zbulimi i mahnitshëm ndodhi ndërsa punëtorët po instalonin tubat.
Ndërtesa është duke iu nënshtruar një rikonstruksioni tërësor, i cili synon ta përshtatë atë për krijimin e studiove dhe zyrave të reja.
Menjëherë pasi u gjet thesari, kontraktori vuri në dijeni pronarin e godinës dhe më pas policinë, duke zbatuar procedurat e parashikuara për raste të tilla. Patrick Face, drejtuesi i policisë lokale, konfirmoi se brenda objektit ishte zbuluar një sasi e madhe ari.
Autoritetet belge duhet të përcaktojnë tashmë origjinën e thesarit, personin të cilit i përket dhe mënyrën se si ari përfundoi i fshehur në mur.
Faza e parë e hetimeve do të shqyrtojë nëse ari lidhet me ndonjë veprimtari kriminale të kryer në të kaluarën. Në rast se kjo mundësi përjashtohet, autoritetet do të kërkojnë të gjejnë pronarin e ligjshëm ose trashëgimtarët e tij.
Sipas Hillaert, verifikimi i prejardhjes dhe i pronësisë së arit mund ta zgjasë procesin për disa vite.
Nëse konstatohet se thesari nuk ka lidhje me aktivitete kriminale dhe pronari ligjor nuk identifikohet, autoritetet do të duhet të vendosin se kujt i takon ari me vlerë miliona euro.
Deri tani, as CAW East Flanders, që zotëron godinën, as kompania dhe punëtorët që e gjetën arin nuk e dinë nëse u takon një pjesë e vlerës së tij apo një shpërblim për zbulimin.
Thesari i është dorëzuar ndërkohë një organi kompetent në Bruksel dhe ruhet nën masa të forta sigurie. Hetimet po vazhdojnë për të sqaruar historinë e arit dhe për të identifikuar pronarin e tij.
