Prefektura Chiba, në lindje të Japonisë dhe pranë Tokios, është goditur nga reshje rekord, të cilat u kanë marrë jetën të paktën gjashtë personave dhe kanë lënë pesë të tjerë të plagosur.
Të lidhura
None found
Në zona të caktuara të Chibas, brenda 24 orëve janë matur mbi 360 milimetra reshje. Sasia e madhe e ujit ka përmbytur rrugë dhe linja hekurudhore.
Autoritetet e kanë përkufizuar këtë si një situatë “të paprecedentë”. Përmbytjet dhe rrëshqitjet e dherave janë shoqëruar edhe me ndërprerje të energjisë elektrike, duke lënë pa rrymë më shumë se 20 mijë familje, sipas BBC-së.
Ndër viktimat është një grua, automjeti i së cilës u mor nga ujërat teksa ndodhej në një rrugë të përmbytur. Dy persona të tjerë humbën jetën më vonë, pasi ishin rrëzuar në rrugë.
Të enjten, autoritetet japoneze aktivizuan nivelin më të lartë të alarmit për emergjencat. Të premten në mëngjes, alarmi u zbrit në nivelin katër, por paralajmërimet për përmbytje dhe rrëshqitje dheu mbeten ende në fuqi.
Guvernatori i Chibas, Toshihito Kumagai, deklaroi se ngjarja është tepër e pazakontë, madje edhe krahasuar me kushtet meteorologjike që përjeton Japonia.
“Kam përballuar shumë fatkeqësi në të kaluarën, por nuk kam përjetuar kurrë një situatë të tillë”, tha ai.
Moti i keq ka çrregulluar ndjeshëm qarkullimin. Disa linja të transportit hekurudhor mbeten jashtë funksionit, ndërsa disa prej autostradave kryesore janë mbyllur.
Kaosi në transport bëri që rreth 7 mijë udhëtarë të kalonin natën të bllokuar në aeroportin ndërkombëtar të Naritës. Personeli i aeroportit u siguroi pasagjerëve ushqime, ujë dhe batanije.
Sipas njoftimit të aeroportit, fluturimet e së premtes pritet të zhvillohen normalisht. Megjithatë, Japan Airlines ka paralajmëruar se mund të ketë vonesa.
Ndërkohë, mijëra njerëz janë detyruar të gjejnë strehim të përkohshëm. Qindra banorë të evakuuar e kaluan natën në disa godina qeveritare në Chiba.
Agjencia Meteorologjike e Japonisë bëri të ditur se reshjet e pazakonta erdhën si pasojë e përplasjes së ajrit të ngrohtë dhe të lagësht me masat e ftohta ajrore mbi rajonin lindor të vendit. Ky ndërveprim krijoi kushte atmosferike jashtëzakonisht të paqëndrueshme.
Parashikimet tregojnë se shirat e rrëmbyeshëm do të vazhdojnë deri vonë të premten. Në zonat e goditura më rëndë, ekipet e shpëtimit dhe forcat e emergjencave po vijojnë operacionet.
