Hassanal Bolkiah, Sulltani i Bruneit, i ka hequr Pengiran Rabiatul Antawiyya-s të gjithë titujt mbretërorë dhe ka vendosur që nusja e djalit të tij të mos jetë më pjesë e familjes mbretërore.
Të lidhura
None found
Masa ndaj 33-vjeçares lidhet me një veprim që pallati e ka përshkruar si “sjellje të papërshtatshme”. Sipas këtij vlerësimi, ajo dyshohet se ka “njollosur emrin e mirë të monarkisë” dhe ka shfaqur “mungesë respekti” ndaj sulltanit.
Nuk është sqaruar nga pallati se çfarë ka bërë konkretisht Rabiatul Antawiyya për të zemëruar sulltanin. Zyra e Kamerierit të Madh ka konfirmuar vetëm se asaj i janë hequr të gjithë titujt dhe se nuk njihet më si pjesëtare e familjes mbretërore.
Rabiatul Antawiyya u bë anëtare e familjes mbretërore në vitin 2015, pas martesës me Princin Abdul Malik. Ai është djali i dytë i sulltanit nga martesa e parë me Mbretëreshën Saleha.
Martesa e tyre u kremtua përmes një ceremonie madhështore dhjetëditore. Çifti ka katër vajza dhe, sipas raportimeve, vendimi i sulltanit nuk ka ndikuar te titujt mbretërorë të fëmijëve.
Një ndër monarkët më të fuqishëm në botë
Hassanal Bolkiah e mban fronin që prej vitit 1967, duke u renditur mes monarkëve me periudhën më të gjatë të sundimit në botë. Që nga viti 1984, kur Brunei fitoi pavarësinë nga Britania, ai ushtron edhe detyrën e kryeministrit të vendit.
Përveç kompetencave të gjera në politikë, sulltani drejton ministritë e Mbrojtjes, Punëve të Jashtme dhe Financave. Ai ka gjithashtu kontroll të fortë mbi institucionet e sigurisë dhe mbi politikën fetare të Bruneit.
Organizatat ndërkombëtare e kanë kritikuar prej vitesh sundimin e tij për problematikat që lidhen me të drejtat e njeriut. Brunei filloi në vitin 2014 zbatimin e një sistemi të ashpër të ligjit penal islamik, që përfshinte ndëshkime të rënda për disa vepra.
Reagime të fuqishme ndërkombëtare pati në vitin 2019, kur hynë në fuqi dispozita që parashikonin dënimin me vdekje përmes goditjes me gurë në disa raste të marrëdhënieve homoseksuale dhe tradhtisë bashkëshortore. Më vonë, qeveria deklaroi se moratoriumi në fuqi për ekzekutimet do të shtrihej edhe mbi këto dispozita.
Megjithëse është përballur me kritika, Hassanal Bolkiah ka mbajtur lidhje të afërta me familjen mbretërore britanike. Marrëdhënia ishte veçanërisht e ngushtë me Mbretëreshën Elizabeth II, të cilën e kishte takuar disa herë ndër vite.
