Një skenë e frikshme u regjistrua në brigjet e Floridës, teksa një avion i Marinës së Shteteve të Bashkuara fluturoi në distance alarmante mbi një plazh të mbushur me njerëz, duke shtyrë autoritetet të ndërmarrin një hetim të menjëhershëm.
Aktorët kryesorë të kësaj ngjarjeje ishin dy aeroplanët e skuadrës së famshme akrobatike Blue Angels, të cilët po zhvillonin programin e tyre “Breakfast with the Blues” në plazhin Pensacola, në mëngjesin e së mërkurës. Në regjistrimet e shpërndara me shpejtësi nga pushuesit, shihet një prej avionëve që i afrohet bregut në një lartësi jashtëzakonisht të ulët, duke kaluar thuajse mbi kokat e turistëve dhe duke provokuar panik të çastit.
Të lidhura
None found
Pas shpërndarjes masive të materialeve filmike në platformat sociale, komanda e ekipit Blue Angels konfirmoi fillimin e një procesi hetimor. Një komunikatë zyrtare sqaroi se, gjatë një manovre për t’iu afruar bregut, një prej avionëve zbriti nën lartësinë e përcaktuar nga rregullorja e sigurisë, çka solli si pasojë alarmin në zonën bregdetare.
Dëshmitarët okularë përshkruan se si vala e fuqishme e presionit të ajrit goditi objektet e pushuesve, duke lëvizur nga vendi çadrat dhe shezlongët e vendosur në rërë dhe duke i detyruar njerëzit të largoheshin me vrap për disa momente nga bregu.
Një banore, e pranishme rregullisht në këto aktivitete, i rrëfeu shtypit vendor se ndonëse i ka adjekur shfaqjet e Blue Angels për një dekadë të tërë, një fluturim të tillë rrafsh me plazhin nuk e kishte parë kurrë më parë.
“Kisha bindjen se avioni do të na vinte sipër. Ishte një përvojë njëkohësisht e tmerrshme dhe mbresëlënëse,” rrëfeu ajo.
Nga ana e saj, Marina Amerikane ritheksoi se mbrojtja e jetës së qytetarëve, publikut dhe vetë pilotëve mbetet një detyrë parësore dhe e padiskutueshme. Sipas njoftimit, shefat e ekipit po shqyrtojnë me imtësi të gjitha elementet që rrethojnë incidentin dhe kanë vënë në lëvizje një rivlerësim të plotë të protokolleve operative. Synimi është që çdo lëvizje ajrore e ardhshme të jetë në harmoni absolute me kriteret strikte të sigurisë të vendosura nga Marina Amerikane dhe Administrata Federale e Aviacionit (FAA).
Procesi hetimor do të hedhë dritë mbi pyetjen nëse pilotët shkelën manualet e fluturimit gjatë kësaj manovre dhe nëse do të ketë përgjegjësi apo ndëshkime për këtë episod, i cili për fat nuk u shndërrua në një ngjarje fatale.
