Prej 37 ditësh, në vend tone vijojnë protestat e mëdha që kërkojnë largimin e qeverisë, ndërsa kërkesa kryesore, e menjëhershme dhe e panegociueshme, mbetet dorëheqja e kryeministrit Edi Rama.
Kreu i qeverisë reagon pothuajse çdo ditë ndaj protestuesve, duke thënë se ata po gënjehen dhe po përdoren, ndërsa ka shkuar deri aty sa të pretendojë se tubimet mbarëpopullore organizohen nga agjentë të huaj.
Të lidhura
None found
Mëngjesin e sotëm, Rama publikoi në rrjetet sociale një poezi të Dritëro Agollit, me titull “Kundërshtarëve të mi”.
“Ju aq baltë po hidhni mbi mua, Sa në baltën që kam përmbi trup Mund të mbijë një dardhë a një ftua, Një korije e madhe me dushk.Në korije dhe dru mund të mbani, Mund të shkoni për gjah me langonj, Mund të ngjiti në pemë të hani, Po të doni dhe dardha, dhe ftonj.Balta ngrihet mbi mua e pasur, Sa mbi baltën korija bleron… Trupin tim ma bleruat padashur Dhe ma bëtë vërtet plantacion”, shkruhet në vargjet që shpërndau kreu i qeverisë.
Ndërkohë, gazetari i njohur Klevin Muka, i cili një ditë më parë pati edhe një përplasje online me kryeministrin, iu kundërpërgjigj me një tjetër poezi të së njëjtit autor, “Një i çmendur një vend e çmend”.
“Në vendin tim e në vendin tënd E shpojnë lakren, i hedhin mënd. Në vendin tim e në vendin tënd Ty te kruhet, tjetrit i dhëmb. Në vendin tim e në vendin tënd Hënën si petull e pjekin në shkëmb. Në vendin tim e në vendin tënd Një i çmendur, një vend e çmënd”, thuhet në poezinë e Dritëro Agollit.
