Një operacion i koduar policor, ka çuar në goditjen e një baze të kultivimit dhe përpunimit të kanabisit në zonën e Divjakës. Si rezultat i kontrolleve intensive nga toka dhe ajri, policia ka zbuluar një plantacion prej 1426 bimësh narkotike të kultivuara në një tokë shtetërore, pranë rezervuarit të Divjakës.
Sipas policisë, pjesa më e madhe e bimëve të gjetura janë asgjësuar në vend me anë të djegies, ndërsa një pjesë është sekuestruar në cilësinë e provës materiale.
Të lidhura
None found
Përveç plantacionit, forcat e rendit kanë zbuluar dhe sekuestruar edhe 44 kilogramë kanabis, e cila ishte duke u përpunuar dhe tharë në një ambient të përshtatur posaçërisht për këtë qëllim.
Njoftimi i policisë:
“Si rezultat i kontrolleve intensive në territorin e qarkut Fier, nga toka dhe nga ajri, me dronë, shërbimet e Drejtorisë Vendore të Policisë Fier, në bashkëpunim me shërbimet e Komisariatit të Policisë Divjakë, bazuar dhe në informacionet e siguruara në rrugë operative, kanë finalizuar operacionin e koduar “Koordinimi”.
Gjatë operacionit, në vendin e quajtur “Rezervuari i Divjakës”, në një tokë shtetërore, u gjet një ambient i përshtatur për tharjen dhe përpunimin e bimëve narkotike. Në këtë ambient u gjetën 37 kilogramë lëndë e dyshuar narkotike kanabis në proces tharjeje dhe 7 kilogramë lëndë e dyshuar narkotike kanabis në formë boçesh. Lënda narkotike u sekuestrua në cilësinë e provës materiale, me qëllim kryerjen e ekspertimit.
Në vijim të veprimeve procedurale, specialistët e Sektorit për Hetimin e Narkotikëve në DVP Fier referuan materialet në Prokurori ku nisi procedimi në gjendje të lirë për veprën penale “Shpërdorimi i detyrës”, për 3 punonjës të Administratës Rajonale të Zonave të Mbrojtura në qarkun Fier, shtetasit:
-E. T., 33 vjeç, me detyrë përgjegjës sektori, F. H., 37 vjeç, me detyrë specialist menaxhimi dhe G. A., 53 vjeç, me detyrë roje. Vijon puna, në drejtimin e Prokurorisë së Fierit, për identifikimim dhe kapjen e autorit/ëve të kultivimit të bimëve narkotike.
Drejtoria Vendore e Policisë Fier vijon kontrollet intensive nga ajri, me dronë, dhe nga toka, me qëllim parandalimin dhe goditjen e veprimtarisë kriminale të kultivimit të bimëve narkotike. Policia e Shtetit inkurajon qytetarët që të denoncojnë çdo rast paligjshmërie, në njësitë e Policisë ose në numrin pa pagesë 112.”, njofton Policia.
