Mbrëmjen e së hënës, një shpërthim i fortë tronditi Principatën e Monakos, duke plagosur tre persona dhe duke vënë në alarm autoritetet, të cilat po e shqyrtojnë episodin si një sulm të mundshëm terrorist.
Mediat franceze raportojnë se në qendër të këtij sulmi të dyshuar mund të ketë qenë biznesmeni ukrainas Vadim Ermolaev, së bashku me bashkëshorten dhe djalin e tij.
Të lidhura
None found
Burime të njëjta bëjnë të ditur se objektivi i mundshëm i bombës që shpërtheu të hënën në mbrëmje pranë hyrjes së një prone luksoze në Monako ishte pikërisht Vadim Ermolaev, oligark i lindur në Ukrainë, i cili mbeti i plagosur rëndë.
Vadim Ermolaev ka lindur në Dnipro dhe në vitin 2019 hoqi dorë nga shtetësia ukrainase për t’u pajisur me pasaportë qipriote. Ai është baba i katër fëmijëve dhe njëri prej tyre, një djalë 13-vjeçar, ndodhej me të në momentin e sulmit, duke pësuar gjithashtu lëndime, por më të lehta.
Një pjesë të madhe të pasurisë së tij, Ermolaev e ndërtoi përmes prodhimit të alkoolit. Përpara luftës në Ukrainë, “Forbes” e vlerësoi pasurinë e tij neto në 220 milionë dollarë, duke e renditur në vendin e 23-të në listën e 100 personave më të pasur në Ukrainë.
Në krye të kompanisë agro-ushqimore “Alef”, Ermolaev figuron edhe si bashkëpronar i kompanisë financiare estoneze “Versobank”, e cila në vitin 2018 u pezullua nga Banka Qendrore Evropiane për “shkelje sistematike të rregullave kundër pastrimit të parave”.
Kur vendosi të heqë dorë nga shtetësia ukrainase dhe të marrë atë qipriote, ai deklaroi: “Dua të përfitoj nga mbrojtja ndërkombëtare. Sistemi gjyqësor ukrainas, për ta thënë butë, është larg të qenit i përsosur dhe administrata tatimore është e anshme”.
Pavarësisht kësaj, ai vijoi aktivitetin e tij ekonomik në Ukrainë dhe në vitin 2021, përmes kompanisë “Alef”, rinisi ndërtimin e një kompleksi të pasurive të paluajtshme në Dnipro. Në të njëjtin vit, ai inauguroi termocentralin më të madh të biomasës në vend.
Në vitin 2025, përmes një postimi në Instagram, ai u shpreh: “Nuk duhet të kënaqemi me kthimin e Dnipro-s siç ishte më parë. Pas kësaj lufte, Ukraina është ndryshe dhe Dnipro duhet të bëhet simbol i qëndrueshmërisë, zhvillimit teknologjik dhe një qasjeje të re ndaj planifikimit urban”.
Nga viti 2023, Këshilli i Sigurisë dhe Mbrojtjes Kombëtare i Ukrainës e ka vendosur nën sanksione 10-vjeçare për bashkëpunim me Rusinë. Miliarderi përballet me akuza se ka vazhduar aktivitetet e tregtisë së alkoolit në Krimenë e pushtuar nga Rusia.
Ermolaev njihet si frekuentues i rregullt i kazinove dhe lëviz me makinën e tij Bentley. Ai ka në pronësi një jaht të madh, si edhe një vilë pranë Saint-Jean-Cap-Ferrat. Sipas inteligjencës ukrainase, ai bën pjesë në “batalionin e Monakos”, grupin e miliarderëve që u zhvendosën në principatë pas shpërthimit të luftës.
