Villa Certosa, rezidenca luksoze në Sardenjë që i përkiste ish-kryeministrit italian Silvio Berlusconi, është blerë nga familja mbretërore e Katarit, dinastia Al Thani, për 350 milionë euro.
Konfirmimi i shitjes erdhi nga Immobiliare Idra, një kompani e grupit Fininvest, që bëri të ditur pranimin e ofertës detyruese për pronën. Me këtë marrëveshje mbyllen muaj të tërë spekulimesh lidhur me fatin e vilës pas vdekjes së Berlusconit në qershor të vitit 2023.
Të lidhura
None found
Mediat italiane, përfshirë La Nuova Sardegna dhe Corriere della Sera, raportuan se bisedimet kishin hyrë në fazën përfundimtare gjatë javëve të fundit. Në fillim, prona ishte hedhur në treg me një çmim prej 500 milionë eurosh, ndërsa interes për blerjen kishin shfaqur investitorë nga Lindja e Mesme, si edhe grupe të mëdha të hotelerisë luksoze.
Prona do të kalojë tashmë në duart e familjes Al Thani, e cila vitet e fundit ka rritur ndjeshëm investimet në zonën e Gallurës, sidomos në fushat e turizmit dhe të shëndetësisë. Sipas raportimeve, transaksioni është kryer përmes një kompanie investimi me bazë në Luksemburg, që administron investimet evropiane të Katarit në pasuri të paluajtshme.
E cilësuar si një prej rezidencave private më të njohura dhe më luksoze në Itali, Villa Certosa ka mirëpritur ndër vite liderë botërorë, aleatë politikë të Berlusconit dhe emra të njohur të botës së biznesit. Prona përfshin një sipërfaqe të gjerë me pishina, spa, shtëpi për mysafirë, ambiente sportive, pistë helikopterësh, një vullkan artificial dhe shumë zona rekreative të projektuara enkas.
Shitja e kësaj vile shënon mbylljen e një epoke për një nga pronat më ikonike të lidhura me figurën e Silvio Berlusconit.
