Kryeministri izraelit Benjamin Netanyahu deklaroi sot se është i hapur për një marrëveshje që do të përfshinte sipas tij përfundimin e operacioneve ushtarake të tij në Rripin e Gazës, ku dhjetëra palestinezë, shumica prej tyre fëmijë, janë vrarë në sulmet e reja izraelite.
Por Netanyahu tha gjithashtu se marrëveshja duhet të përfshijë “mërgimin” e grupit islamist palestinez Hamas dhe “çarmatimin” e enklavës së rrethuar palestineze që është shkatërruar pas më shumë se 19 muajsh lufte, sipas një njoftimi për shtyp nga zyra e tij.
Këto deklarata vijnë një ditë pasi ushtria njoftoi se do të intensifikojë operacionet e saj ajrore dhe tokësore në Gaza me qëllim lirimin e pengjeve izraelite të mbajtura nga Hamasi dhe fitoren ndaj kësaj organizate. Intensifikimi i operacioneve është dënuar nga bashkësia ndërkombëtare.
“Ekipi negociator në Doha po punon për të shfrytëzuar të gjitha mundësitë për një marrëveshje”, thuhet në deklaratë, “qoftë brenda kuadrit të planit (të propozuar nga i dërguari amerikan Steve Witkoff) ose brenda kuadrit të një përfundimi të luftimeve që do të përfshinte lirimin e të gjithë pengjeve, dëbimin e terroristëve të Hamasit dhe çarmatimin e Rripit të Gazës”.
Megjithatë, një zyrtar i lartë izraelit tha se deri më tani është bërë pak përparim në bisedime.
Të paktën 464 palestinezë të vrarë javën e kaluar
Të paktën 464 palestinezë janë vrarë në sulmet ushtarake izraelite në Gaza javën e fundit, sipas një deklarate të lëshuar nga Ministria e Shëndetësisë e enklavës.
Përveç kësaj, raportohet se 1,418 palestinezë janë plagosur në të njëjtën periudhë, midis 11 majit dhe 17 majit.
