Interi njofton se mesfushori shqiptar Kristjan Asllani ka rinovuar kontratën me klubin zikaltër deri në vitin 2028.
Kristjan Asllani, pasi ka zyrtarizuar rinovimin me zikaltërit, ka dhënë një intervistë për Inter TV.
Çfarë përfaqëson ky rinovim për ju, që i keni admiruar gjithmonë ngjyrat e zikaltërve?
“Për mua ka qenë gjithmonë një ëndërr të luaj me këtë ekip, është nder të luaj me këtë fanellë. Kjo kontratë është një burim krenarie, por unë e marr atë si një pikënisje për gjërat ku duhet të rritem dhe përmirësohem. Siç them gjithmonë, stërvitem përkrah kampionëve dhe jam i lumtur që kam djem të tillë, ndaj jam i sigurt se ky rinovim është edhe rezultat i ndihmës së shokëve të skuadrës”.
Jeni në sezonin tuaj të tretë me Interin, nëse shikoni prapa nga viti 2022 deri më sot, në çfarë mendoni se jeni rritur më shumë?
“Unë jam bërë padyshim më i vjetër, kur erdha isha 20 vjeç, isha fëmijë. Tani jam pothuajse 23 vjeç dhe padyshim që jam rritur në kokën time edhe jashtë fushës. Vlen shumë të kesh kampionë pranë, që më ndihmojnë çdo ditë, por jam rritur në shumë mënyra”.
Mund të themi se jeni rritur me ekipin? Fryma e grupit ka mbetur gjithmonë e njëjtë.
“Ka gjithmonë uri për të fituar dhe dëshirë për të ngritur trofe. Dua të falënderoj djemtë e vitit të parë dhe ata të vitit të kaluar, të gjithë më ndihmuan dhe më bënë të kuptoj se çfarë do të thotë të jesh te Inter”.
Cilat janë synimet tuaja për këtë sezon?
“Në nivel personal dua të rritem dhe përmirësohem çdo ditë, jam ende 22 vjeç, kështu që duhet të përmirësohem në shumë gjëra dhe e di gjithashtu. Në nivel ekipi, kur je Inter, duhet të fitosh sa më shumë, të fitosh disa kupa. Ne e dimë se nuk do të jetë e lehtë, është e vështirë të rikonfirmohesh, por ne do të japim më të mirën tonë”.
Lojtari i lindur në vitin 2002 u ble nga Empoli për rreth 15 milionë euro: deri më tani ai ka bërë 64 paraqitje dhe ka shënuar një gol për zikaltërit.
