Një 27-vjeçar dhe një foshnjë tre muajshe janë gjetur pa shenja jete në një shtëpi në fshatin Demiraj të Gjilanit. Policia e Kosovës është njoftuar për rastin më 1 nëntor, rreth orës 08:47.
Në vendngjarje kanë mbërritur njësitet policore, Prokurori i Shtetit dhe ekipi i emergjencës mjekësore. Aty është konstatuar vdekja e të dy viktimave.
Të lidhura
None found
Pas veprimeve të para hetimore, policia ka arrestuar babanë 65-vjeçar të 27-vjeçarit, nën dyshimin për vrasjen e dyfishtë. Me vendim të prokurorit, ai është ndaluar për 48 orë, ndërsa rasti është cilësuar si “Vrasje e rëndë”.
Rrethanat e plota të ngjarjes mbeten të paqarta. Trupat e pajetë janë dërguar në Institutin e Mjekësisë Ligjore për obduksion dhe hetimet po vazhdojnë.
Kryetari i Gjilanit, Alban Hyseni, u ka shprehur ngushëllime familjarëve të viktimave. Ai tha se humbja e dy jetëve, në rrethana ende të pasqaruara plotësisht, është një tragjedi që prek çdo qytetar. Hyseni kërkoi që organet e rendit dhe të drejtësisë të angazhohen plotësisht për zbardhjen e të gjitha rrethanave.
Për rastin reagoi edhe ministrja e Drejtësisë, Donika Gërvalla. Ajo theksoi se familja duhet të jetë vendi më i sigurt për njeriun, ku mbizotërojnë dashuria, harmonia, kujdesi dhe mbrojtja. Gërvalla kërkoi hetim të plotë e pa vonesa, në mënyrë që të zbardhet e vërteta dhe institucionet përgjegjëse të ndërmarrin veprimet e kërkuara nga ligji.
Institucionet e rendit dhe të drejtësisë vijojnë hetimet për zbardhjen e ngjarjes që ka tronditur Gjilanin.
