Spitalet në Afganistan janë urdhëruar nga regjimi taleban të ndalojnë kryerjen e transplanteve të kornesë, pasi këto ndërhyrje janë cilësuar si të kundërta me mësimet islame.
Urdhri, i përcjellë gojarisht nga zyrtarët talebanë te kirurgët, ka sjellë ndërprerjen e programeve të transplantimit në Kabul dhe Jalalabad, sipas raportimeve të The Telegraph.
Të lidhura
None found
Vendimi ka shkaktuar shqetësim të madh, pasi qindra persona me dëmtime të rënda të syve rrezikojnë të humbasin përgjithmonë mundësinë për të parë.
Transplanti i kornesë është një procedurë kirurgjikale që mund t’ua rikthejë shikimin pacientëve me dëmtime serioze të kësaj pjese të syrit dhe, në shumë raste, përbën të vetmen alternativë ndaj verbërisë së përhershme.
Së fundmi, një organizatë bamirëse mjekësore amerikane kishte financuar trajnimin e kirurgëve afganë dhe kishte siguruar falas kornea të dhuruara, në mënyrë që edhe pacientët pa mundësi financiare të mund t’i nënshtroheshin trajtimit.
Me ndalimin e vendosur nga talebanët, kjo nismë është ndërprerë dhe shumë njerëz kanë mbetur pa qasje në një ndërhyrje që mund t’ua ndryshonte jetën.
Lista e pacientëve në pritje përfshin edhe shumë të rinj që kanë humbur shikimin nga shpërthimet, aksidentet, plagosjet e rënda ose incidentet e ndodhura gjatë punës me saldimin e metaleve. Për këta persona, operacioni ishte ndër mundësitë e pakta për të parë sërish dhe për t’u rikthyer në jetën normale.
Dr. Noor Zaman Hashim, nga Spitali i Syrit Noor, e ka konfirmuar situatën, duke thënë se kirurgët kanë marrë udhëzime verbale nga zyrtarët talebanë për të mos kryer më transplante të tilla.
Ai ka deklaruar se mjekët kanë frikë se mosrespektimi i urdhrit mund t’i bëjë ata subjekt të ndëshkimeve të ashpra.
Pezullimi ka rritur shqetësimet për të ardhmen e shërbimeve shëndetësore në Afganistan, ndërsa qindra pacientë vazhdojnë të presin një mundësi për të rifituar shikimin.
